無比較無傷害 相比下滙控年息率欠吸引力
隔晚美股個別發展，道指盤中創新高後回軟，收市倒跌，市場觀望周五就業數據公布。雖然近日美股業績期，美企公布業績普遍交到好成績，但基於估值已高問題，加上受變種病毒所困擾，市場開始擔心美股隨時出現大調整。留意月中全球央行年會Jackson Hole將於月中舉行，鮑爺會否在會上宣布縮表，若然真係落實，美股難免有較大震盪。
至於港股呢邊，早段恒指高開53點，見26289點已屬半日高位，有官媒文章批網絡遊戲危害社會，作為手遊一哥嘅騰訊(00700)跌到反肚，其他手遊股閒閒地質低一成以上。恒指喺騰訊走弱下，一度跌461點，見25744點半日低位，但A股中午曾回升，港股跌幅亦收窄。半日恒指跌248點，報收25987點；國指跌103點，報收9233點；恒科指大跌2.4%或160點，報6635點。
藍籌股大部份腳軟，不過交出亮麗業績嘅信義光能(00968)半日升近一成，係最大升幅藍籌股；其他傳統藍籌股普遍下跌。騰訊半日跌一成，藍籌嚟講單日跌一成都無乜幾可，不過有關官媒《經濟參考報》發表題為《「精神鴉片」竟長成數千億產業》文章，其實喺上場完結前已下架，估計下晝跌幅可收窄。其他手遊股係命運共同體，半日普遍跌一成或以上，嗶哩嗶哩(09626)創本港上市新低，半日跌11.3%。雖然相關文章已下架，但手遊股咁跌法，即使收窄跌幅，仍然重創，尤其阿爺開到口批評打機，仲話要及早合理規範，睇嚟呢個板塊都係有得震，無得瞓，千祈咪手多去接飛刀。
雖然大笨象(00005)恢復派息，但年息率都係4厘左右，而業務發展前景，亦因為中美角力而進入兩難局面，噚日業績前升幅已完全抹去，小心42元支持位不保，主要係美國10年債息跌至兩周新低，對銀行息差構成壓力。老老豆豆，真係有心買銀行股收息，不如揀年息率普遍有7厘嘅內銀股，建行(00939)跟工行(01398)年息率都有咁嘅水平，當然阿Man一向唔鼓勵買股收息，但相對大笨象年息率確係欠吸引力，所謂無比較就無傷害， 一比較自然高下立見。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。