無水到大市未能渠成難向上突破
耶媽放風話加息對聯儲局係好事，即惹嚟加息疑雲，隔晚美股個別發展，市場靜待今個星期會公布嘅CPI，一旦數字持續高企，或逼使聯儲局提早結束貨幣寬鬆政策，而聯儲局將會喺呢個月15及16日舉行貨幣政策會議，會議前一星期，聯儲局官員進入緘默期。即係想再為通脹，加息呀，乜乜物物都要封口，睇下市場點解讀今個禮拜將公布嘅通脹數據。
恒指高開113點報28900，最多曾升191點，高見28979，但29000阻力大未能收復呢片失地，加上A股受壓，港股掉頭向下，恒指倒跌144點，低見28642，再失守20日線及50天線，最終半日跌101點，收28685；國企指數報10697，跌51點；科指收市跌93點。半日大市成交650.02億元，靜過鬼，雖然好多股價都下跌見紅，但沽壓唔算重。
藍籌個別發展，大笨象(00005)吽吽逗逗無升跌；建行(00939)跟工行(01398)微升， 友邦(01299)繼續97元水平徘徊，半日微跌0.3%。美團(03690)再受審查，股價半日跌2%，監管機構打壓沒完沒了，話咗呢批股份短期難有運行，都係上上落落居多；阿里(09988)被受罰後股價都未能起死回生，暫時喺200-215之間上落。小米(01810)已澄清長沙倉庫絲毫無損，並未失火，但股價高開低走，半日倒跌0.5%。
汽車股今日出咗5月份銷售數字，有資金流入炒作，其中吉利(00175) 5月銷量增26%，留意截至上月銷量僅達全年目標35%，就嚟半年都未做到一半目標，呢樣要提高警覺。其他汽車股普遍升2%以上，都係資金輪動，板塊輪流炒作，認同汽車板塊下半年會做返高啲，都係趁回調嗰日買穩陣啲。
恒大(03333)系財政狀況惹人關注，不過公司用到回購呢一招，股價半日彈返1.5%，連恒大呢一隻欠債最高嘅內房股都升，其他龍頭內房無理由唔表現一下自己嘅身價，重磅內地股普遍上升，不過內房股同樣受政策打壓，都係眼看手勿動。
手機設備股炒咗陣又要抖抖，咁啱舜宇(02382)畀滙豐研究調低目標價，半日股價跌4.4%，其他手機股亦隨大市下跌。呢個板塊炒咗幾日，回吐都合理，至於乜嘢位可以上車，不如等跌定搵咗個支持位再算，暫時都係觀察住先。
大市暫時仍然反覆，睇嚟呢段時間喺無資金流入，及無其他利好消息，睇嚟個市都係上上落落居多，未能進一步突破向上，暫時受制二萬九阻力，但28300-28500應有不俗支持。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。