熊市反彈大挾淡友 成交未能配合難言真轉勢
美股連續兩日急彈，道指兩日急升近1600點，美匯回落，10年美債息亦見回落，加上英國撤回減稅方案，刺激英鎊回升，歐洲股市亦做好，港股喺周一再創11年新低後，放完假返嚟，今日終於彈返近千點，收復萬八關。
恒指高開732點，早段升幅曾收窄至603點，見過17682半日低位，不過10日線似乎頂得幾吓，守咗10日線就再度向上推進，升幅持續擴大，成功收復萬八關，盤中更一度升945點，見18024半日高位。中午接近高位收市，報18013，升933點；國指半日升343點，報6200；恒科技升超過7%，升253點，中午報收3680。不過以半日升近千點嘅市況嚟睇，半日只有583.97億元成交，成交唔算配合升幅，未見新資金入場。之前好幾次北水休假期間，港股就大挾淡倉，都北水回歸即割韭菜，如果早兩日喺萬七水平未有買貨，家下先嚟追貨自己執生。
藍籌股大部份上升，只有碧桂園(02007)半日跌0.5%及碧服(06098)無起跌表現較差，而石藥(01093)半日跌1.8%，更成半日表現最差藍籌股。申洲(02313)半日升12.4%，藍籌之中跑第一，友邦(01299)半日升逾6%，表現亦唔差，65元水平買貨係合理，留意70至75元，可能由之前嘅支持位變成短期阻力。人民幣回升，平保(02318)半日彈近一成，成功收復10日線，即管睇睇有冇本事再上埋20日線，即42元水平之上。港交所(00388)之前屢試年內新低，今日借勢反彈至280元水平之上，睇住280元若再失守，有機再向下260元尋找支持。李寧(02331)及安踏(02020)反彈力度不俗，半日分別升8.8及9.4%。
美債息回落，有助科技股反彈，AMTJ半日以騰訊(00700)彈5.5%最失威，美團(03690)跟阿里(09988)半日升逾7%，京東(09618)半日更升一成。其他科技股閒閒地升半成或以上，就連之前弱過藥煲嘅舜宇(02382)亦彈8.4%，相對騰訊半日升得5.5%真係好削。
英國彈弓手，喺群眾壓力下，宣布撤回早前提出嘅減稅方案，英鎊回升兌美元重上1.14水平，相關重英國資產股做好，大笨象(00005)半日升5.9%，渣打(02888)跟保誠(02378)半日分別升7.1%及8.8%；至於長實系反而只有長和(00001)升逾半成，長建(01038)跟長實(01113)半日升2%。美匯指數回一回，金價重上1700美元水平，金礦股回升，普遍升3%以上。
港股半日升近千點，睇個款下晝都唔會點回，高開高走半日高收，擺明要挾死淡友，當全世界都話個市要落萬六點，大戶就偏偏捉住淡友嚟砌，睇個款今日一定唔會放生淡友，目前大市已重上10日線，下個位當然係20日線大約係18300水平，9月21日有一個下跌裂口喺18400左右，呢個裂口能否回補完再上係後市關鍵，阿Man就唔敢太樂觀，無論美股呢兩日反彈，又或者今日港股嘅回升，都只能視為熊市中反彈，並非擺脫熊市步入牛市嘅轉捩點。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。