眾多中企上半年等上市 港股上半年仍處安全期
隔晚美股表現反覆，納指再創新高，道指先升後回，但港股今早則回吐，曾跌逾500點。港股顯著回吐主要係內地北京及上海先後出現本地確診個案，而澳門亦喺超過200日零確診個案後終失守，香港更有個別疫情嚴重嘅地區，或需實施隔離措施。恒指今早低開118點，早段跌幅曾收窄至64點，見過29862點半日高位，其後再反覆向下，最多跌504點，見29423點半日低位。恒指中午報收29480點，跌477點；國指半日跌182點，報收11707點；恒科指跌得最少16點，半日報收9793點。
其實恒指今個月由27500點突破升至30000點水平，中間未曾見顯著回吐，家下中國無論係天子腳下嘅北京，抑或力守不失嘅澳門都淪陷，香港本身疫情又反覆，更發展到要圍封部份地區，疫情嚴重正好畀大市一個調整藉口。藍籌股大部份腳軟，只有騰訊(00700)跟美團(03690)逆市向上，後者更再創新高。被美國制裁嘅中海油(00883)遭MSCI剔出多個指數，半日跌5.5%；涉軍禁令嘅小米(01810)半日則跌3.6%，重返30元樓下。對於小米擁戴者如阿Man，小米又出現特價時段，上周五因為禁令而急挫嘅小米，30樓下買到，本周初上到32元短炒目標，輕輕鬆鬆又執咗5至10%，家陣小米又見特價，唔係有錢都唔願執呀。
雖然大市回吐，但仍有醫藥股光伏股今日逆市上升，上周阿Man喺其他平台推介過嘅藥明康德(02359)發盈喜，預期去年多賺五成，股價逆市創新高，半日升近一成，200元短線目標價已到，相對推介時170元樓下水平，短短一星期升幅近兩成，要食糊，請起筷。同系藥明生物(02269)跟藥明巨諾(02126)亦創新高，分別升5.4%和5.7%，藥明生物更加係半日升幅最大藍籌股。
除咗醫藥股之外，光伏股今日亦見資金流入，福萊特玻璃(06865)獲得89億人民幣合約，股價升3.5%；信義能源(03868)升2.3%；保利協鑫(03800)批股後反更起勁，半日升5.4%；旗下協鑫新能源(00451)升25.4%；新特能源(01799)大升10.2%。暫時大市都係資金輪到，但話個市咁就玩完，絕對係膚淺，尤其一直口淡淡嗰班股市悲情友，咪以為今日回幾百點就係股災殺到嘅先兆，大市經過一輪急升，就算調整至29000水平，再跌多幾百點都未有耐股災。只要市場流動性仍在，資金仍然充裕，股市只會水漲船高，更何況單係上半年已經有超過20間中資企業排住隊要嚟港股上市，港股至少喺上半年仍然係安全期。繼續日日呼天搶地大叫股災殺到嘅長期淡友，只會一次又一次錯過呢個由源源不絕嘅北水所帶動嘅升浪。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。