石油股邊夠中東佬炒 三桶油避之則吉
美股一直位高勢危，預咗隨時調整，用擔心變種病毒肆虐全球，其實只係跌市之後搵個理由解釋，講真又唔係第一日發現變種病毒，全球疫情除咗中國之外，其他國家一直未見完全受控，早前只因為部份發達國家疫苗接種率有所提升，以為疫情可受控，而亞太區內大部份地區，疫情一直嚴峻。講到底，美股大幅回調，都係同估值有關，美股喺上半年屢創新高，而經濟未真正完全復甦，咁估值追唔上，殺估值係必然嘅事。不過港股就真係慘情咗啲，自年初見咗三萬水平高位後，持續喺區間上落，五未太窮，六又未絕下，以為七可翻身，豈料美股跟內地股市唔爭氣，港股就繼續陪跌，今日又再失守俗稱牛熊分界線嘅250日線(27169)。
受美股隔晚急跌拖累，恒指今早低開93點，曾止跌回升最多43點，見27532點半日高位。可惜內地股市腳軟，港股再度走弱，最多跌358點，見27131點半日低位，創7月9日以嚟最低，更失守牛熊線。恒指收報27163點，跌325點；國指跌146點，報9811點；恒科指連跌四日，半日跌121點，報收7310點。半日成交額734.73億元唔算多，沽壓未致太嚴重。
藍籌股幾乎全面走低，只有港鐵(00066)跟港交所(00388)逆市上升，前者更升逾2%，為最大升幅藍籌股。ATMX全線下跌，小米(01810)半日跌2.3%，四股之中跌最多，不過要撈貨ATMX之中係佢較為安全，至少唔係平台股，受網絡審查機會較低，叫做無乜政策風險。騰訊(00700)、阿里(09988)跟美團(03690)分別跌1.5%、0.6%及0.8%，話咗平台股暫時無得搞。港交所半日靠穩升0.19%，唯一中美角力嘅受惠者，有心買貨吼510至520之間收集。
市場避險情緒升溫，資金湧入債市令美國10年期債息跌穿1.2厘水平，創五個月低位，息差收窄壓力下，銀行股梗係無運行。大笨象(00005)跌1.9%，跟恒指同步五連跌；同系恒生(00011)跌1%，渣打(02888)更跌2.7%，其他本地銀行股閒閒地跌1%以上。
OPEC跟盟油達成逐步增產協議，加上疫情惡化或拖累經濟復甦進度，石油需求自然減少，隔晚國際油價急挫，今日三桶油同埋其他油服股全面向下。阿Man講過無數次，油價升跌難捉摸，供應就由OPEC跟產油國話事，基本上一般股民邊度夠班中東佬炒油叻，所以阿Man一向唔炒石油股，市場上咁多股可以揀，又何必捨易取難呢……
恒大(03333)發生乜嘢事，唔使阿Man多講，恒大一向被阿Man視為不宜炒作嘅內房股，可以話以重磅大size嚟講，恒大喺阿Man心目中，再大嘅市值亦難除去其妖味，全因債台高築，講到明係最重債嘅內房股，反正市場咁多內房股，為何要偏偏揀佢買?? 恒大系內股份繼續插水，阿Man無水晶球，唔會估底亦無打算撈貨，反而內房跟物管股受消息拖累緊水，可以撈個別物管股，短線繼續吼世茂服務(00873)，母公司一向唔算大槓桿，債唔算重，本身世第三方項目方發展理想，24-25呢啲位可以收集。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。