禁令股避而不買純食花生
美股隔晚較為淡靜，雖然上周衝擊國會山莊一事，未對市場帶嚟好大震盪，但下周拜登就職典禮，市場點都有顧忌，呢幾日採取觀望態度亦好合情合理，所以隔晚美股除咗納指跑贏，其餘兩大指數表現都算呆滯。至於港股今日反彈，多得美國放騰訊(00700)同阿里(09988)一馬，唔將佢哋列入制裁實體清單，加上中國去年進出口總值創新高，帶動港股回升逾百點。
恒指高開172點，報28408，見完半日高位，開市後升幅收窄，一度得返44點升幅，低見28280，但中國公布去年進出口總值創新高，大市重拾動力，半日升逾百點收市。恒指半日收報28375，升139點；國企指數升79點，報11264；恒科指升201點，收8871，盤中曾見8875，創指數成立後最高，
藍籌股個別發展，今日又係友邦(01299)同大笨象(00005)腳軟，半日分別跌1.7%及1.1%，但中海油(00883)半日升5.2%，仲有得彈。但講到今日升市動力，主要來自ATM，傳侵侵政府決定，唔再將中國科企納入禁止美國人與企業投資嘅制裁名單，龍頭科技股向好。阿里升4.5%；騰訊升幅差不多，都有4.4%；美團(03690)最經升5.6%，三隻股份貢獻恒指248點。
道富忽然轉軚表示恢復買入制裁股，皆因道富唔係美國註冊公司，不被視為美國企業身份，三大中資電訊股回升，中移動(00941)升3.6%；聯通(00762)升2.6%；中電信(00728)升4%最勁。不過呢啲股份始終係制裁名單之上，道富唔停買，但其他美資基金沽完唔會買返，阿Man選擇避而不買，反正市場上大把其他選擇。
至於上兩個星期熱炒嘅新能源股，踏入呢個星期唔多精神，咁之前升得急又有番咁上下累積升幅，回吐好正常，阿Man一再重申能源股仍然係今年上半年嘅焦點主題股，回吐反而係低吸好機會，只要計好數，心中有個止蝕價可守，分段買入博中線，喺20日線附近上車應該博得過。
生物科技股今日表現甚為亮麗，信達(01801)、百濟神州(06160)跟康方生物(09926)均創新高，呢三隻股阿Man喺直播節目都有提過，都係本身質素唔錯嘅生科股，只係之前資金流出整個板塊，捱唔過嗰吓調整，當然等唔到今日新高。不過有時選擇等待，係會錯過好多其他機會，機會成本都要計算喺持貨成本內，不過信達跟百濟終再創新高，又引證阿Man所講嘅『價值只會遲到，而不會缺席』。若然對呢個信念無懷疑，咁刻下新能源股調整，阿Man仍深信係搵位上車好機會。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。