科技股寒流下切忌槓桿
美股上周五反彈，但美國國債息率持續高企，再次逼近1.6厘水平，中港股市高開低走，恒指50日線得而復失，高增長股繼續被殺估值。恒指高開264點，最多升288點，見半日高位29386點。其後喺高增長被持續殺估值下，恒科指倒跌，重磅科技股急挫，拖累恒指半日最多跌523點，低見28573點。中午恒指跌幅收窄至1.3%，報收28708點；國指跌137點，收11154點；恒科指跌4.8%，收8221點。
藍籌以藥明生物(02269)跌8.8%最傷，吉利(00175)緊隨其後跌7%，而油價持續做好，布蘭特油價更首度重返70美元水平，三桶油半日升1.3%至5.5%，萬洲(00288)表現亦特出，逆市升半成。
科技股繼續捱估，估值愈高愈被狠沽，但連估值已接近合理水平嘅騰訊(00700)，半日亦跌3.6%；美團(03690)一向被視為高估值，半日跌6.6%，今個星期派成績表嘅京東集團(09618)，即使分拆陸續有來，亦難逃被沽，股價半日跌逾半成。阜博集團(03738)預期去年扭虧轉賺逾千萬美元，但股價高開13.7%後掉頭，中午倒跌12.6%，認真攞命。而表現最差科指成為股係微盟(02013)，半日唔見一成。
今日金融股做好，呢期呢個板塊都逆市做強，有分析指今年為上市銀行淨利潤增速，係過去5年最高一年，咁因為係去年基數低，而目前銀行股估值仍接近歷史較低水平。板塊內銀股半日錄得超過1%至近5%升幅不等。
科技股近日跌勢快且急，期間反彈乏力。令唔少持貨缸邊友已感到懷疑人生，但阿Man堅信，只要呢批股份業績交足功課，基本面無重大改變，喺業務發展盈收入仍高速增長下，高增長股經過呢一輪調整，最終都會重拾升浪。若然過完農曆年假返嚟，無高位減貨相反仲要高追，又無嚴格執行止蝕的話，跌到依家帳面應該輸咗三四成，現價先去止蝕已經太遲，反而目前可以做嘅係好好守落去，只要債息回落，大市終止跌勢，重納升軌，新經濟股仍然會係彈得最快嘅板塊。當然阿Man喺過年前已再三提醒，要減倉同去槓桿，若然上月中仍然唔肯減低槓桿，由跌浪展開至今累積回吐近三四成，應該無法捱過呢個科技股寒流。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。