科網股反彈周末前要識落車
美股隔晚開高低走，三大指數下跌，不過港股噚日跌先一步，今早喺A股靠穩下，反而有得彈。雖然內地對科網企業監管未有放鬆，但規範對行業未來發展係好事，短暫陣痛換嚟 更健康嘅長線發展，其實計落又唔係壞事，科網股今日有反彈。恒指高開154點，見25870點半日低位，但成功重返20日線(25770點)，其後升幅擴大，收復兩萬六及10日線(26008點)，最多升447點，見26163點半日高位。恒指中午收報26139點，升423點；國企指數報9370點，升186點；恒科指半日升168點，報6728點。
藍籌個跌發展，海底撈(06862)都幾得意，唔係跑第尾就係跑第一，今日彈6.3%，成為最大升幅藍籌股，暫時仍受制50日線，日升日跌表現反覆，呢啲位無乜好博。ATMX今日齊六反彈，美團(03690)半日彈5.2%表現最好，四大天王之中，美團低位反彈計，力度最佳，暫時100日線(267)有阻力，係差100及250日線(292)尚未收復。反彈3.6%嘅阿里(09988)成功重上20日線，暫時160元似乎有不俗支持，只係50跟100日線暫仍有距離，收復失地需時，250日線更遙不可及，高位接咗貨除咗耐心等待，已別無他法。騰訊(00700)半日彈1.6%，雖然企穩20日線，但仍於10跟50日線匯聚區之下，唔企穩493元，想向上挑戰100日線(548)有難度。本來監管風險最低嘅小米(01810)，公司持續回購但仍未令走勢充喜，四大天王之中，唯獨小米現處所有平均線之下，26由之前支持變阻力，目前支持位下移至22至23元。其他科網股普遍反彈，不過阿Man都係嗰句，成個板塊都係玩緊range trade，監管規範一日未完結，相關股份都係有波幅，冇升幅。吼到低位撈貨，睇住上落區間做人，記得要識得落車。
金屬資源股炒高見回吐，隔晚倫敦期鋁升1.9%至每噸2848美元，再創2008年以來新高。鋁業股急升後，升幅縮水無咁截，中國鋁業(02600)曾升5.5%，見7.1元近四年高，半日升幅收窄至1.9%。宏穚(01378)仲誇張，早段曾升9%，但中午收市前升幅幾近抹去，得返唔夠1%；俄鋁(00486)半日更倒跌。反而其他金屬資源股表更佳，江銅(00358)升3.8%；洛鉬(03993)升4%；紫金(02899)升5.5%。不過阿Man一向對資源金屬股印象麻麻，雖然今次呢個板塊嘅升勢唔算短癮，但咸魚青菜，各有所愛，呢個板塊向來唔係阿Man杯茶。反而上星期推嘅華潤水泥(01313)，財息兼收，早段曾升8%，中午升幅仍保持5%，都算對粉絲有交代。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。