科網股反彈有波幅冇升幅
隔晚標指跟納指齊創收市兼紀錄新高，美股成日都話怕高處不勝寒，但就行三步先褪一步，暫時仍處於強勢。雖然有分析指進入秋季美股市場「脆弱性」衝擊風險正在上升，因為季節性因素跟聯儲局政策，債券購買規模預計會逐漸減少，只會增加未來幾個月發生更大市場衝擊嘅可能性；但係穿頂唔估頂，目前玩美股就唯有留意幾時轉向，好難走去估頂拗氣逆勢而行。
相反港股就行一步褪幾步，噚日恒指彈咗六百幾點，仲以全日高位收市，以為今日點都延續反彈勢頭，誰知高開低走，連條10日線(25734)都守唔住，得而復失。恒指高開202點報25930，早段曾升254點，見25982點半日高位，但二萬六阻力大，暫時受制此關。盤中由升轉跌，一度倒跌179點，見25548點半日低位。午市跌幅收窄，恒指半日收報25634，跌93點；國指跌51點，報9047；科指倒跌6點，報收6439。
噚日表現較弱嘅傳統金融股，今日繼續腳軟，滙控(00005)跌0.8%；友邦(01299)跌0.2%；安踏(02020)噚日公布業績，一度高見175元水平，但獲利盤湧現，今日一度跌近8%，中午收市跌5.5%，跌幅收窄至5.5%，但仍為表現最差藍籌股。不過安踏回落至100日線(159.4)水平又有得博，畢竟100日線咁耐以嚟未穿過，呢啲位入場，用返上月低位150嚟做止蝕參考，反正佢又唔受監管風暴影響，十蚊八蚊博佢上返180樓上，都有一定值博率。至於噚日勁彈嘅ATM，今日彈力已減弱，美團(03690)都仲叫保住2.3%升幅，騰訊(00700)早段曾升至490元水平，但至中午升幅已縮水到唔夠1%；阿里(09988)更倒跌1.6%，連170元水平都企唔穩。信義光能(00968)半日升4.4%，藍籌之中佢至叻。
火電股噚日整固，不過阿Man都話相對累計升幅，回調幅度細，沽壓有限，抖咗一日今日又嚟料，中國電力(02380)追落後，半日勁升12.4%，已經連升五個交易日，其他火電股閒閒地升3%以上，只有之前領軍嘅華潤電力(00836)升1%，今日算係失威。
科網龍頭怒彈一日，今日已缺動力，二線科技股表現更差，金山軟件(03888)派完成績表，半年純利倒退98%，主要係遊戲收入遠較預期遜色，市場擔心影響日後現金流，但雲計算業績又唔係咁差，增長都好過預期，跌穿30都有博反彈吸引力，公司業績雖倒退，但又唔係無錢賺，單日股價跌逾兩成有啲跌過籠。其他二三線科網股，今日好多都回返2%以上，只有業績表現出色，重新吸引連登契媽入場嘅京東(09618)半日仍錄得升幅。之前極度睇淡中概股嘅契媽，啱啱又轉口風，話中概股長線仍睇好，個別股份已回落至吸引水平，一時一樣，真係變心快過打針。阿Man對科網股則維持原判，暫時都係有波幅，冇升幅，幾時呢個板塊先回復昔日魅力，睇怕要阿里旗下嘅螞蟻重新啟動上市，監管風暴告一段落，呢個板塊先有條件再發光發熱。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。