科網股拖累 港股暫難向上突破
滴滴出行喺美國上市無幾耐，國家互聯網信息辦公室要求滴滴出行App下架，真係巧合等係阿爺夾啱時間先向滴滴開刀，阿Man無多作揣測，只係知道阿爺呢一着，搞到平台股跌到一仆一碌，港股跌勢持續，今早再創個半月低位。恒指低開211點，最多跌267點，見28042點半日低位，創5月14日以來新低，其後拗腰，曾倒升28點，見28338點半日高位。可惜中午收市前壓沽再現，恒指中午收報28181點，跌128點；國企指數報10297點，跌117點；恒科指半日跌175點，跌幅超過2%。半日A股微升，港股自殘無得再姓賴，話又係畀A股拖累。 滴滴出行app慘遭下架，市場憂慮當局對科網股打壓捲土重來，甚至加大力度，相關科網股全線下跌，平台股表現份外疲弱。作為滴滴主要股東，受app下架消息影響，騰訊(00700)半日跌3.9%，有機會考驗多次支持位550元，一旦失守，短線只有繼續尋底，下一個較強力支持，要倒帶睇返大半年前嘅低位517元。其他平台股跌幅閒閒地超過2%，其中落緊地獄嘅快手(01024)完全唔識彈，須知無人估得中個底，千祈咪見累計跌幅巨大，就手多入場接飛刀，通常未跌定，圖表搵條下影線睇睇都無，仲要繼續向下尋底。記住快手招股價係115元，雖然現價較高位跌咗六七成，但仍高招股價高出幾十個巴仙。暫時平台股不宜沾手，其實呢個幾月以嚟，即使ATM見反彈，阿Man都唔建議入場博，皆因阿爺針對平台股消息沒完沒了，短期呢個板塊繼續無運行。 汽車股今日反彈，比亞迪(01211)半日反彈逾5%，成為表現最好藍籌股，吉利(001175)跟長城(02333)分別升4.9%及6.3%；而東風(00489)上車回A行發保薦書，股價半日升8%。不過要揀汽車股，阿Man都係傾向龍頭比亞迪、吉利跟長城，其他汽車股唔夠穩陣，以業績表現計，都係對三隻龍頭信心強少少。 除咗汽車製造商，汽車代理及4S股今日亦唔錯，中升控股(00881)繼有多間大行調高其目標價後，公司折讓近9%批股予高瓴旗下基金，集資額接近30億元。雖然折讓批股，但接貨係猛人高瓴，股價未受壓之餘，再創新高，半日升逾5%。 港股第三季開局表現認真麻麻，關鍵係恒指能否守住28000點，若然28000失守，短線可又要再試27500水平，暫時炒股唔炒市，幾隻重磅科網股拖累下，港股要向上突破29500點似乎未係時候。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。