科網股趁反彈減磅跳車
美股業績期，美企普遍交出理想業績，即使美股估值唔平，但投資者有信心，業績可維持較高估值，美股低開高走，反覆向上，標指再創收市新高。而A股今早亦做好，帶動港股低開高走，反彈重上26500水平，並收復10日線(26310)。
恒指低開32點，早段曾跌184點，見過26009點半日低位，二萬六暫時有支持，喺重磅科技股止跌回升帶動下，恒指成功收復10日線，半日最多升456點，見26650點半日高位。恒指中午報收26605，升410點；國指中午報收9497點，升177點；恒科指半日升3.4%或225點，報收6921點，差一步重返七千水平。
重磅藍籌股個別發展，大笨象(00005)回復派息，股價業績前醒一醒又打回原形，暫時都係喺42至45之間浮浮沉沉，悶局一場。港交所(00388)跟友邦(01299)齊齊升1%；其他藍籌股乏善可陳，資金都係跟消息炒個別板塊。
國務院印發《全民健身計劃（2021-2025年）》，預計到2025年帶動中國體育產業總規模達到5萬億元人民幣。呢啲計劃其實都係圍繞人民身心健康問題，配合落實三孩政策，要有強健體魄，先有心有力去生育。體品股乘機落鑊，等咗好耐安踏(02020)破頂，半日升5.4%，不過高位企唔穩，要變身雙紅底股都仲要啲時間。李寧(02331)亦升8.4%，不過未夠其股東非凡中國(08032)升近兩成勁，主要係市值細得多，輕身容易炒。其他體品股全線上升，不過都係嗰句，暫時只係反彈市，市況仍反覆，高追易中伏，無貨都係食花生算數。
電動車股熱情未減，比亞迪A股創新高，H股(01211)齊破頂，半日升7.3%，GX中國電車(02845)創新高，半日升5.8%；吉利(00175)跟長汽(02333)半日升半成，小鵬汽車(09868)亦有3.1%進賬。由於投資者怕咗內地監管政策，資金避過呢類股份，流入受惠政策扶持股份，令到相關股份出現擠擁交易，咁人哋係咁逼，夾硬追貨，無貨就無謂搶埋一份，睇好呢個板塊都等回吐先收集。
澳門新增一家4口確診新冠肺炎，擔心再次喺社區爆發疫情，港澳通關遙遙無期，濠賭股幾乎全線下跌，只有金沙中國(01928)跌至今年低位後反彈，半日倒升0.4%。不過中港澳要通關睇嚟都唔會係短期內嘅事，呢個板塊暫時唔使睇。
阿爺彈出彈入，手遊股一日之內來回地獄又折返人間，科網股都係，今日反彈，騰訊(00700)早段曾跌至434元低位，其後倒升反彈近5%，不過都係嗰句，市場對中概股信心盡失，尤其阿爺政策無得估，朝令夕改叫人無所適從。大量資金流出呢個板塊後，短期唔會食回頭草。反而重貨嘅，好應趁反彈減磅，如果噚日夠勇有執平貨，真係食糊唔使同佢客氣。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。