累積升幅巨大熱股 短線震盪屬正常調整
投資者喺拜登下周就職前表現審慎，美股隔晚先升後回，港股今早低開102點，報28394點係半日低位，其後港股掉頭回升，最多升170點，見28667點半日高位，創1月20日後高位，但A股高開低走，港股升幅縮水，至中午收市恒指升幅更不足1點，報收28496點。國指半日跌11點，報收11287點；恒科指中午報收145點，報8749點。
侵侵仲有不足一個星期離任，但對中國毫不鬆懈，繼續狙擊內地企業，將小米(01810)等9間中資企業列入美國制裁名單，加上A股企唔住，港股半日表現反覆。藍籌股中以小米表現最差，半日跌近11%，小米低開後一度由29元開市低位反彈至30.5元，但30元樓上沽盤不絕，終令小米半日重返低位。
阿Man對小米前景仍充滿信心，加上按互聯互通嘅數據，北水持有超過一成小米，其實小米自上市以嚟，外資都唔多睇好小米，外資持有小米唔算多，而當中美資所佔份額更少，即使按侵侵嘅行政命令，美資基金或美國投資者，要喺今年11月11日前沽清所有被列實體名單嘅制裁股份，但小米嘅主場係北水，只要北水守得住，甚至給力再掃貨，小米跌至現水平，接近50日線28.33元料有強大支持。如果未有小米嘅缸邊友，依家係建倉嘅大好機會。
不過今日話晒係周末前夕，再加上下周拜登就職前，投資者態度傾向審慎，小米要消化被制裁呢個負面消息都要啲時間，但只要小米守得住28元，應該無乜大礙。小米嘅業務有錢途，基本因素亦無乜變，阿Man仍有信心小米今年市值可向萬億推進，即係小米股價要見40元唔係大問題。短期震盪並唔會打亂阿Man對小米嘅中長線投資計劃同部署，30元樓下嘅小米絕對係建倉好機會。
至於其他藍籌股個別發展，今日輪到友邦(01299)回升2.5%，騰訊(00700)跟阿里巴巴(09988)分別升00.6%及2.6%，齊齊撐起大市。傳統股今日搶晒風頭，尤其係內銀股，今日有資金湧入，郵儲行(01658)獲「畢非德接班人」李祿旗下喜馬拉雅資本增持，中午大升10.9%；招商銀行(03968)去年多賺4.8%，中午亦彈高5.6%；四大國有銀行升幅由0.7%至2.5%不等。不過阿Man對於內銀股忽然強勢都係無乜感覺，暫時內銀股仍未能吸引阿Man眼球。
市場對新能源股熱情冷卻，之前愈係炒得勁嘅新能源股，呢幾日跌得愈厲害，福萊特玻璃(06865)連跌六日，半日再跌4.8%，信義孖寶亦腳軟，信義光能(00968)半日跌3.3%，細寶信義能源(03868)亦跌4.6%。風電股亦不能倖免，閒閒地跌2%以上。除咗新能源股之外，之前一齊熱炒嘅汽車股，今日跌幅亦顯著，吉利(00175)、長汽(02333)跟東風(00489)半日齊齊跌6%。對於呢幾日汽車股跟新能源股嘅回吐，阿Man視之為正常調整，相關股份短線累積巨大升幅，喺下周拜登就職前，缸邊友減持好正常。衝量好持貨能力及好好管理風險，即使面對短線震盪，亦可以從容面對。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。