缸邊友日日捕住彈高就做淡
港股今早半場跟走隔晚美股走勢，嚟一個拋密線式下墜，恒指早段一度彈近200點，但21000變成阻力位，倒跌失守上日低位，至11點特首主持嘅記者會開始後，跌幅進一擴大至超過500點，一度跌510點見20255半日低位，創自2016年6月底新底。 恒指高開54點報20820，早段曾升191點，高見20957半日高位，但連企返上21000嘅氣力都無，加上A股升勢不保，港股亦掉頭向下，最多跌510點，低見20255，創逾68個月新低。最終恒指半日報收20311，插454點；國指半日跌156點，中午報收7081；恒科指又創成立後新低，跌98點，報收4283。 藍籌股大部份捱沽，ATMXJ半日全線下跌，阿里(09988)又創上市後新低，果然係跌穿紅底低處未算低；騰訊(00700)、美團(03690)、京東(09618)跟小米(01810)，半日分別跌3%、2.7%、2%及0.6%。其化重磅股只有大笨象(00005)逆市升1%；友邦(01299)半日再跌逾3%，跌穿78元支持後，急急腳又落多一成，目前險守70大關。港交所(00388)連跌多日，跌足半個月，到依家都仲未搵到個底，自從450個橫行平台失守後，短短一個月跌咗三成，堂堂大藍籌可以跌成咁，可想而知港股有幾差。其他藍籌普遍偏軟，信義光能(00968)又炒兩個國策，叫做係少數逆市升嘅藍籌股，半日反彈逾半成。 體品股今日捱沽，挪威政府養老基金撤資，拖累股價半日急挫一成，已經跌咗七個交易日；安踏(02020)陪跌，半日亦唔見9%，兩股成為表現最差嘅藍籌股。其他體品股閒閒地都要跌近4%，特步(01368)半日亦跌近9%。 生科股繼續尋底，藥明生物(02269)信達生物(01801)算難兄難弟，半日分別跌8.3%跟7.9%，其他生科股普遍跌5%以上，呢個板塊可以話滿地屍骸。過往一直係阿Man愛股嘅藥明生物，自從一次狼來了傳被美國列黑名單，成功博反彈後已分手，跟住第二次子公司再被列入清單，阿Man已無再博反彈，甚至無再眼佢一眼。呢個故事話畀大家知，你再愛嘅股份，走勢逆轉唔割愛都唔得，千祈唔好同股票講感情。 暫時港股仍然係反彈乏力，除咗外部受地緣政治因素不穩所影響，內部疫情亦令港股動彈不得，尤其係全民檢測遲遲未落實細節或執行計劃，漸變成傳聞檢測，每日要因應疫情而進行抗疫調節細則，令人無所適從。喺咁嘅狀況下，個個都唔多想入場浪費子彈，唯有攞住現金作準備，而爛炒嘅缸邊友，就日日捕住彈高就做淡，港股近日高開低走成為新常態。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。