美團騰訊反彈不代表資金重返政策風險股
中國通脹數據表現唔錯，市場觀望美國通脹數據，隔晚美股個別發展，而港股唔少藍籌排住隊派成績表，大市進入好淡拉鋸階段，喺10日線(26163)上下爭持，投資者變得更為審慎。恒指高開176點，半日最多升191點，高見26475，但早段A股受壓，港股倒跌144點，見26138半日低位，稍穿10天線後見支持，大市收復失地。最終恒指中午報26359，升76點；國指升72點，報9386；科指升91點，報6756。
美團(03690)傳聞或被罰10億美元後，可能市場有心理準備計到罰款條數，美團噚日已低開高走，今日再下一城，股價半日再升6.4%，似乎市場對監管風暴嘅恐懼已逐漸消退。騰訊(00700)半日亦升4.4%，兩股為恒指貢獻175點升幅，資金有重返科網股跡象。相對阿里(09988)就落後得多，口痕友話馬雲自從衰多口之後，一直無運行，阿爺至今都未真正原諒馬雲。小米(01810)舵手雷軍今晚有演講會，市場有所期待，但股價半日僅升0.8%，始終28至30元阻力大，就算上多些少去到28左右，都未必能再向上突破。其他藍籌表現呆滯，大市升幅真係全靠美團跟騰訊反彈，留意舜宇(02382)上月出貨量再跌23%，已經連續兩個月下跌，半日股價跌近6%，暫時下一個支持位喺210元，想撈貨不如等多日，跌定買貴好過買錯。
內地鼓勵發電企業自建儲能或調峰能力增加併網規模，不過唔係全部新能源股有得升，今日反而係炒起啲細晒士嘅三四線股，反而啲大隻佬光伏股，高開後全部無影。奇怪係東岳(00189)一枝獨秀升7.8%，皆因有內地券商指電池用PVDF供應緊張，料短期問題會續困擾市場。反而贛鋒鋰業(01772)創新高連續第二日回吐，暫時失守20日線，若然160企唔穩，下個支持位要落到150元。
大市表現仍反覆，雖然市場對於內地監管已逐步消化，但並唔等於資金會即時大舉買入政策風險高嘅板塊，騰訊反彈主要係其現價估值已有一定吸引力，但美團現價估值其實唔算平，暫時對高政策風險股取態慬慎啲好，始終小心駛得萬年船。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。