美股係威係勢 港股繼續閉翳
美股繼續做好，標指又創新高，但港股噚 日突破企穩50日線後，今日唔單止打回原形，仲要嘔突。主要係美國經濟快速復甦，引發通脹憂慮，美債息率又再攀升，加上印度疫情嚴峻，港股半日再跌逾400點。
恒指低開159點，報29143點後，曾收窄跌幅至148點，見29154點半日高位，但高增長股沽壓顯著，恒指一度跌478點，見28824點半日低位，唔單止50日線(29080)得而復失，連10日線(28983)都保唔住，只能險守20日線(28857)。恒指中午報收28856點，跌447點；國指跌179點，半日收10870點；恒科指跌近2%，報收8340點。
噚日撐起半天嘅友邦(01299)半日跌3%、內銀股及內險股亦唔精神，只有中石油(00857)上季成功扭虧，半日升4.3%，成為表現最好藍籌股。科技股繼續受監管消息所困擾，內地監管部門繼續約談網絡平台，對13間從事金融業務的網絡平台企業進行監管約談，提出七大整改要求，相關股份全線下挫。汽車股面對芯片短缺問題，沽壓沉重，睇嚟呢期汽車股都無運行。半日只有醫美股逆市做好，但阿Man鮮有跟進呢個板塊，錯過就算數，尤其星期五更無買貨意欲。
大路重磅股搞唔掂，不如睇下較冷門嘅股份，之前偉祿集團(01196)收購本地老牌百貨公司先施(00244)，雖然最終已有公司公告指最新公告指收購嘅先決條件已經完成，保監局對偉祿成為先施人壽保險及先施保險置業嘅控權人表示無異議，但過程可以話係波折重重。
先施係百年老店，耐何後人經營不善，加上面對零售業寒冬，業績已連續六年見紅。幸而有偉祿擔當白武士，喺舊年提出以約5億元進行全面收購，惟收購嘅先決條件，必須包括其保險牌照。而喺舊年8月，保監局提出先施不得訂立新保險合約嘅條件後，為求交易能順利完成，先施大股東馬景煊同陳文衛就宣佈將賣殼所得嘅2.6億元，不可撤回地送俾公司，明顯為咗增加單交易嘅吸引力。
誰不知今年2月，馬、陳二人突然宣稱2.6億元無償送贈嘅契據喺「受到不當影響及威逼」下簽立，單方面宣佈契約無效，呢單嘢令市場嘩然。講到「威逼」而簽立契約，已涉及刑事行為，兩人何解唔去報警而選擇喺被「威逼」足3 個幾月先意圖以一紙聲明撤回贈股契約，內裡乾坤無須贅述，明眼人都知是怎麼一回事。正當大家都以為賣盤交易「凍過水」之際，呢個星期三晚間突然傳出收購先決條件已經完成嘅好消息，沉寂已久嘅先施股價瘋狂抽升，喺當日港股升幅榜上排名第二，單日成交超過1億股，股價一度飆升至0.78元，創逾十年新高，收市升幅收窄，股價仍升咗八成。不過今日先施跟偉祿股價雙雙回軟，先施更回咗超過一成。
成功收購先施嘅偉祿，股價表現更值得留意，公司上月尾公佈嘅業績相當靚仔，重點發展嘅金融同物業投資業務均有不俗表現，近排留意到有機構資金開始入貨，公司股價淨係四月份已經累升咗兩成一。偉祿本身已有企業融資顧問、資產管理、證券經紀服務及保證金融資等業務，今次收購先施進入大直路，將保險牌照納入囊中，勢必令其金融業務範疇更加廣泛及完善。趁股價回吐至11元附近小注博一博稍後再創新高，跌穿10.2止蝕，都叫有數圍。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。