聯儲局放鷹震散全球股市
隔晚聯儲局議息一如預期維持息率不變，但鮑爺就放鷹，話依家嘅政策未足以應付通脹，所以唔排除跟住落嚟每次開會都加息，換句話講，即係今年有機會加夠7次息，咁鷹嘅口吻，有乜辧法唔震散股市，美股先升後回，拖累亞太區股市冚包散。港股裂口低開後，再喺道指期貨顯著下跌情況下，恒指跌逾600點，失守50日線(23867)，超過八成股份下跌，跌勢都幾全面。
恒指低開337點報23952，開市已失守24000關，其後愈跌愈多，50線亦告失守，最多跌649點，見23640半日低位。恒指半日收報23664，跌625點，國指報收8256，大跌256點，恒科指報收5344，跌252點，跌幅達4.5%。
藍籌股幾全線仆直，重磅股中只有大笨象(00005)逆市升0.2%；港鐵(00066)逆市升0.7%，已經係表現最好藍籌股。其他重磅股閒閒地跌2%，友邦(01299)半日跌2.6%，失守85元。其他內銀內險股亦腳軟，雖然歐美加息，但內地放水，加息呢個消息幫唔到佢哋。科網股跌勢更為顯著，沽壓沉重，ATMXJ齊齊過堂，當中小米(01810)再破52周低，跌穿17元跌勢更急，完全唔識停，難怪有缸邊友叫小米做西米，皆因股價走勢一路向西。阿里系一門兩杰，阿里巴巴(09988)半日跌6.5%，家陣已有口痕友打賭，幾時阿里破百，失去紅底股身份。騰訊(00700)跟京東(09618)半日分別跌3.2%及4.8%，今日科網股跌少過半成已算本事。其他科網股跌超過3%，其中嗶哩嗶哩(09626)急墜11.8%，為表現最差恒科指成份股。
藥股食咗瀉藥咁款，皆因聯儲局放鷹，高估值股捱沽，生科股估值一向唔平，加上部份更無盈利，防守性當然低，整個板塊今日表現差人意，唔少股份均跌逾一成，藥明系三股份跌幅喺一成之內已跑贏同業。
內房跟物管股亦回軟，恒大(03333)稱爭取半年內提重組方案，並會積極與債主溝通，本來係好消息，至少唔使行到摺埋嗰一步，但內房跟物管板塊今日都難逃一跌，而跌幅較少都係財務狀況較佳嘅內房，好似潤地(01109)、龍湖(00960)跟中海外(00688)，仲有民企代表碧桂園(02007)，半日跌少過2%，相對其他被債務問題困擾嘅房企，半日閒閒地跌半成以上，當中時代中國(01233)大幅折讓17%配股抽水，半日更急挫近三成，上述幾隻財力較雄厚嘅內房股，表現已算好得多。所以有心趁平收集內房股，都係睇住潤地、龍湖、中海外跟碧桂園，其中又以碧桂園最為落後，值博率較高。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。