股份落鑊炒作唔需要理由
美股上周五做好，標指跟納指再創新高，亞太區股市今早做好，A骰半日亦升超過1%，港股反彈至近兩星期高位。恒指高開340點，一度升417點至29706點半日高位無以為繼，升幅一度收窄至133點，見29422點半日低位。中午恒指報收29480點，升192點；國指半日報收11636點，升75點；恒科指升16點，報收9812點。
藍籌股個別發展，騰訊(00700)無懼抖音按反壟斷法告上北京法院，股價半日升0.8%，之前阿爺點晒名讚騰訊掌舵人，有阿爺加持，騰訊科企皇者地位穩如泰山。小米(01810)半日反彈，話咗小米上周狠插主要為殺牛，當大部份牛證殺得七七八八，小米靠穩好正常。小米暫時守住條100日線，長線投資上周阿Man已吹晒雞收集，短線博重返10日線(28.9)，再重返20及50日線匯聚區，即30元水平左右。當然中線唔係睇呢啲位，今年內見10000億市值為目標，對應股價要見40元。
接近農曆年長假期，假期及線上娛樂股落鑊，手遊股繼續炒作，中手游(00302)跟網易(09999)齊升2%，市場憧憬呢個春節假期，為抗疫仍要保持社交距離，減少聚集，宅在家自然會打多咗機。同程藝龍(00780)及復星旅遊文化(01992)半日別升4.3%及11.9%，對於呢類出行股，阿Man唔覺得喺疫情仍未減退，阿爺亦唔鼓勵四周出行旅遊下，升勢可維持，純粹係搵個藉口炒作。至於影業類股份，包括貓眼娛樂(01896)、阿里巴巴影業(01060)及華誼騰訊(00419)等，亦唔屬於長炒長有嘅板塊，高追博唔過。睇返呢兩個板塊，其實概念完全相反，雖然都係炒作假期來臨，但一類係出行概念，另一類係宅在家概，基本上互相矛盾，可見股份炒作根本唔使講理由。
除咗出行股，濠賭股亦落鑊，主要铁疫苖已送抵澳門，濠賭股上周開始熱身，今日繼續落鑊，半日普遍升3%或以上。其實澳門開始注射疫苗又如何，唔等於澳門可以回復適日繁盛，重點喺港澳之間未能回復正常往來，內地旅客數字亦未回升，只可以話濠賭股最壞時候已過去，當其他新經濟股及科技股炒到出煙嘅時候，呢個板塊相當落後，加上近日大行開始睇返呢個板塊，認為要買入呢個板塊，等待中港澳三地旅遊氣泡加快落實協定。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。