航運股如高追定止蝕嚴守
隔晚美股個別發展，納指跟標指再創新高，道指則走軟。美股已踏入季度業績高峰期，已公布首季業績嘅美企，超過八成公司每股收益都好過預期，如果呢個比例一直維持至業績期完結，今個季度美企嘅業績，將會係自2008年表現至好嘅一季。不過有分析提醒投資者，當拜登政府推出更多刺激經濟措施，以及疫苗接種進度加快，經濟增長加速或帶來通脹，屆時定必令美股走勢更趨波動，投資者要有心理準備，喺呢個夏天美股要大玩過山車。
至於港股半日繼續喺二萬九水平爭持，恒指低開57點，一度跌159點，見28793點半日低位，至20日線(28756)見支持，其後倒升78點，見29031點半日高位，可惜二萬九關得以復失。恒指中午報收28910點，跌42點；國指報收10986點，升5點；恒科指則升53點，報8538點。扣除藥明生物(02269)配股上板貨逾百億金額，半日成交只有700幾億元。
藥明生物配股司空見慣，主要股東減持亦唔係第一次，半日暫守配股價之上，跌近6%，係表現最差藍籌股。不過藥明生物過往多次批股，股份均落入強中手，相信今次亦唔例外，估計只要少少時間消化配股消息，其後藥明股價又可重拾升軌，配股反而提供咗收集機會。
美團(03690)被內地當局立案調查其涉嫌壟斷行為，早段低開後迅速轉燈倒升，相信係跟市場早有心理準備美團畀阿爺盯上，而有預測指美團即使被罰款，對美團業務運營影響不大，參考阿里(09988)案例，美團被罰款項大約四五十億左右，美團之前已成功向市場抽水，資金充裕下，畀阿爺拎一百幾十億亦無乜事嘅。最點係之前一直受壟斷調查所困擾，美團卻逆境下批股，上限訂價仍獲投資者搶住要貨，主要股東騰訊(00700)亦有認購，擺到明係唔介意美團畀阿爺懲罰，個個都仲睇好其前景，今早特價時段瞬間即逝，股價好快重上300樓上。大笨象(00005)派首季業績，早知首季唔會派息，不過業績好過預期，對股價會有短線刺激，只係48至50阻力大到超難擊倒，有貨好諗諗要唔要趁機走人。
內地有報道指，蘇彝士運河堵船事件一個月後，運往美國西岸及東岸為每個40英尺集達4432及5452美元，比擱淺事故剛發生後的3月底大升逾一成，航運股升唔停，不過唔少航運股已升抵今年高位，甚至破咗頂，追唔追貨阿Man無意見，總之高追得記要set好個止蝕位。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。