航運股調整完成留意海豐
美國就業市場改善，加上企業公布季績理想，已公布季績嘅標指成份股，超過八成盈利表現均超過預期，更有唔少企業調高全年盈利預測，支持美股持續做好，標指再創收市新高。而侵侵宣佈自創社交程式「TRUTH Social」，以對抗封殺他的Twitter、Facebook等社交網巨擘。呢個社交程式母公司Trump Media & Technology Group(特朗普媒體及科技集團)宣布，通個SPAC收購Digital World Acquisition Corp.(美股：DWAC)上市，亦帶動唔少中小型股熱炒，納指進帳近百點。
至於港股今早反覆向好，早段高開97點後，雖曾倒跌41點，見25976點半日低位，但二萬六關失而復得，係買低吸買盤支持下，大市再度回勇，半日最多升177點，見26195點半日高位。中午恒指報收26132點，升115點；國指則升98點，報收9372點；恒科指升125點，報收6761點。不過周末效應下，缸邊友唔敢太進取，半日成交只有713億元。
重磅股之中，藍籌股表現麻麻，只有比亞迪(01211)份外醒神，曾創296.8元新高，半日報收296.2元，升半成；吉利(00175)半日亦升近2%。一直弱過弱煲嘅瑞聲(02018)今日失驚無神發力，半日升5.4%，剛升至20日線有啲阻力，但都真係好耐未見過瑞聲有咁嘅表現。大笨象(00005)跟友邦(01299)齊齊抖氣，半日分別跌0.2%及0.9%。
有消息指恒大(03333)償還一筆喺9月底到期嘅美元債利息，市場憧憬恒大債務危機或有望解決，加上阿爺派內房產業派定心丸，除咗指內房債務問題可控外，亦指示內銀要向健全嘅內房企業提供正常借貸，帶動內房股炒高。一向被視為財務狀況較穩健嘅潤地(01109)、中國海外(00688)跟龍湖(00960)等，升幅由3.3%至6.4%不等。奇怪係槓桿比例較高嘅融創(01918)竟然升8%，阿Man就認為內房股要博都係揀返啲財政狀況較佳，及有央企或國企背景嘅內房股穩陣。
電力股繼續回調，華潤電力(00836)被大和降目標價，半日跌3.4%，其他電力股，無論火電或其清潔能源電力股都好，齊齊下跌。至於之前阿Man吼位喺16元水平買入嘅龍源電力(00916)，其實早已達標見咗18元水平，有跟阿Man上車都食晒糊，如果仲有貨尾單位未走人，今日睇住17元水平或20日線17.3元定去留。
航運股靜咗一輪，已較高位調整唔少，唔少股都跌到咁上下並已開始搵到支持，今日阿Man就吼住海豐國際(01308)，股價喺25元水平有不俗支持，呢啲位上車，博佢上返28至30元，用返條250日線做止蝕參考。有兩間大行都調高其目標價，大和就睇46.5元，滙豐研究更加進取，睇53元，咁阿Man呢啲位博上30元，一啲都唔貪心。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。