藥明生物遭減持急跌可小注博反彈
隔晚美股第N次創新高，三大主要指數創收市新高，呢兩日連反映小型股嘅羅素2000指數亦連日破頂，美股高處未算高，主要係已公布季度業績嘅標指成份股，超過八成都好過預期，市場對疫情影響企業盈利表現嘅疑慮一掃而空，投資氣氛保持樂觀。加上隔晚聯儲局議息，維持利率不變，雖然同時宣布每月減少買債150億美元，為收水揭開序幕，但債息反應溫和，市場似乎已消化有關聯儲局嘅收水預期。
至於港股維持上落市格局，恒指挑戰二萬六關遇阻力後，連日下跌，不過回落至24800至25000水平又見承接，似乎短線喺呢個位搵到支持。暫時未有特別利好或利淡消息，預期大市短期會喺24800至26000之間上落。
恒指高開116點，一度升220點，見半日高位25244點，其後又見沽壓，倒跌14點，見25010點半日低位，半日成交額只有653.93億元，反映市場入市信心不足，但嚟到呢啲位沽壓又唔算太嚴重，令港股進入膠著狀態，唔上唔落。半日恒指報收25092點，暫守二萬五關，半日升67點；國指則升47點，報收8904點；恒科指升63點，半日報收6336點。
美國嘅科網股持續走高，大型科網股今日見資金流入，ATMX撐起大市，騰訊(00700)升1.6%；美團(03690)跟阿里(09988)則齊齊升逾2%；小米(01810)呢期較弱，半日僅升0.2%。但金融股表現較弱，友邦(01299)跟大笨象(00005)半日走軟，分別跌0.1%及0.2%，內銀股亦唔見好得去邊，建行(00939)半日跌0.5%。
阿Man一對愛股藥明生物(02269)跟比亞迪(01211)表現迴異，藥明主要股東之一嘅高領資本減持，股價半日曾跌穿紅底，但跌穿100元後即見反彈，有買盤趁低吸納，股價終守百元大關，半日跌7%，報收102.5元。如果純粹係高領減持，而喺基本因素無變之下，藥明喺100元水平不妨撈少少博反彈，博股價重返250天線約109元水平。至於比亞迪(01211)周一宣布配股，但阿Man都講咗，配股係低吸好機會，因為比亞迪始終係內地電動車龍頭，而配股集資係為咗加強研發能力及改良生產線，對公司發展有利，配股唔死，今日股價成功重返300元企穩，再創新高係遲早嘅事；半日股價升6.5%，係今日表現最好藍籌股，阿Man前日趁配股推介，證明無老點。
另一個阿Man近日熱愛嘅板塊當然係新能源股，而當中嘅風電龍頭，更加成為近日阿Man聊天室內嘅熱炒對象，低買高沽食盡波幅，今日終企穩18元樓上，重返20元高位再創新高係下一個目標。如果嫌龍源（00916）太大隻唔啱胃口，另一隻細size啲嘅大唐新能源(01798)半日市升逾7%，只要企穩3.3元，突破3.5元指日可待。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。