資金板塊輪動 翻炒生物科技股
美國上周五公布就業數據遠遜預期，美國並唔急於收水，美股上周五個別發展，港股今早則隨A股做好，重上26000關。恒指低開74點後，見25827點已經係半日低位，A股走強，港股止跌回升，半日最多升181點，見26083點半日高位，其後升勢回順。半日恒指報收26034點，升132點；國指報收9332點，升41點；恒科指報收6715點，跌13點。
藍籌股個別發展，重磅股各自發展，騰訊(00700)據報申請註冊WeChatCloud商標，股價半日升3%，ATMX之中表現最好，阿里(09988)半日僅升0.5%，美團(03690)跟小米(01810)分別跌0.4%及2.3%。反彈咗幾日嘅科技股，阿Man上星期話差不多到阻力位，科技股反彈可能都要抖抖，其實呢個板塊都只係繼續區間上落，避免高追，反而待回吐至移動區間底部，就可以試一試撈貨短炒。
新能源股及電力股繼續熱炒，不過有個別股份高開低走，中午見回吐。新能源股中，以電動車股表現較好，比亞迪(01211)公布8月銷量增86%，股價半日升5.7%，走勢方面，成功企穩260元水平後，可挑戰270-280元。至於母公司身陷財困嘅恒大汽車(00708)，半日反彈近一成。不過對於恒大呢一系，阿Man始終都係嗰句，避之則吉，恒大系滿布債務地雷陣，博反彈好可能會因小失大。如果電動車股太多，有選擇困難，貪方便就揀GX中國電車(02845)，半日升1.9%，當然ETF升幅唔會比得上個股，如果整個板塊嚟講，始終比亞迪係龍頭首選。
新能源股則個別發展，中國電力(02380)、東方電氣(01072)跟東岳(00189)就半日分別回吐5.9%、3%及8.6%，暫時要抖抖。而潤電(00836)持續有大行調升目標價，早段曾急升14%，但至中午升幅縮水至得返1.2%，咁多間大行一齊大合唱，升勢係咪去到尾聲唔敢講，但從走勢圖睇，咁長枝避雷針喺上面，有貨先食糊止賺亦合情合理。至於其他電力股，新天綠色能源(00956)半日升近一成表現強勁，穿頂唔估頂，有貨睇住今日開市價止賺，高追就唔建議。
生物科技股今日亦見資金吸納，龍頭兼藍籌藥明生物(02269)半日升4.4%，上星期阿Man又喺個人嘅炒股聊天室叫喺112撈貨，時間啱啱好。不過藥明系最勁係藥明巨諾(02126)，半日升近兩成，升勢有餘未盡；同系藥明康德(02359)亦升6.3%。其他唔少生物科技股閒閒地錄得5%以上升幅，相對藥明生物叫升得唔多，但阿Man就係貪佢夠穩陣。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。