資金炒股唔炒市 股仔續禾雀亂飛
隔晚美股表現反覆，早段三大指數低開，其後隨住鮑證出席聽證會又上大落，最終三大指收都係報跌散場，步入熊市後嘅美股，單日波幅擴大，並出現日升日跌嘅反覆狀況，而三大指數反彈力度正在減弱。至於港股噚日跌逾500點後，今早反彈，但20日線(21245)仍未能企穩。
恒指高開149點，最多升280點，見21289半日高位，但仍受制20日綼，升幅幾乎抹去僅餘2點，見21010半日低位。不過日A股做好帶動恒指回升，半日升200點，報21209；國指升91點，報7426；恒科指升64點，報4617。半日成交額縮水至593.1億元，反映現水平資金入市並不積極，尤其係重磅股風頭被細價股搶去，缸邊友炒股唔炒市，集中去炒三四線股仔。
藍籌股普遍向上，下跌股份19隻，其中以中電(00002)表現較差，今早再創52周低位，半日跌近1%，報收65元。港交所(00388)半日微跌0.2%，友邦(01299)跟大笨象(00005)則分別升0.5%及0.7%。已經唔知第幾次再傳阿里(09988)旗下螞蟻集團重啟IPO，一時又話搵咗投行顧問，一時又話交咗申請，一時又話內地監管機構未審批其上市申請，一時又話開綠燈無問題，總之就三兩日傳一次有關消息。雖然狼來了咗咁多次，但市場傾向相信螞蟻集團上市係遲早嘅事，加上阿里現價估值便宜，總有資金願意買入，令阿里今日成為交易金額最高股份，半日股價升逾4%。
汽車股又有阿爺幫手催谷，國常會確定加大汽車消費支持政策，研究免徵新能源汽車購置稅政策年底到期後延期問題，消息利好汽車股。吉利(00175)半日升7.5%，係表現最好藍籌股，股價更升至3個月高位。理想汽車(02015)再創本港上市新高，半日再升近一成，其他汽車股閒閒地升5%或以上。而汽車零件股加勁科技(00588)發盈喜，半日升逾一成，其他相關股份亦錄得可觀升幅。
阿Man早喺上個月已表現，航運股炒作已屆尾升，有貨見好要識收，尤其受經濟陷入衰退威脅下，航費運已見頂，難以長期高企，下半年甚至調頭回落。事實上，過去一個月波羅的海乾散貨指數(BDI)已累積一定跌幅，隔晚指數更再跌逾半成，航運股今日捱沽。對BDI最敏感的太平洋航運(02343)半日插7.6%；東方海外(00316)半日亦跌7.2%，藍籌之中跑第尾。其他板塊內股份，普遍跌逾3%或以上。東方海外成為藍籌之後，股價偏輪停滯不前，如今喺航運股或由盛轉衰，步入另一個周期下，未知東方海外會否一如過去年幾以嚟，成為藍籌嘅股份一樣，市值大縮水。以航運股趨勢嚟睇，東方海外似乎都難打破呢個宿命。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。