公司配股控股股東減持為大市平添沽壓
雖然全球多地疫情喺變種病毒下反彈，但美國拍賣240億美元20年期國債反應理想，加上拜登政府計劃再推至少1萬億美元刺激經濟方案，美股連跌兩日後反彈，道指跟標指升近1%，納指更升1.19%。港股噚日畀變種病毒嚇親，恒指跌逾500點後，今日隨港股反彈，但彈力當然相差一大截。
恒指高開95點後，一度升226點，見28848點半日高位，可惜10日線(28792)得而復失，一度倒跌24點，見28597點半日低位，最終20日線(288624)仍守，只係受制於10日線。恒指中午報收28754點，升132點；國指升41點，報收10930點；恒科指升84點，報收8269點。
藍籌股都係個別發展，連登契媽旗下ETF增持騰訊(00700)跟美團(03690)分別升1.8%及2.5%，雖然係反彈，但阿Man講咗呢期受政策困擾，平台股好難有運行，都係有波幅，冇升幅。友邦(01299)跟港交所(00388)分別升0.8%及0.7%，阿Man早兩日推介過嘅舜宇(02382)則升1.8%，另一蘋概藍籌股則跌2.6%，幾時都話舜宇好過瑞聲。
資源股又回勇，主要係鉑金價格創新高，黃金價格亦回升，資源股有資金追捧，尤其鋼鐵股表現突出，中國東方(00581)、鞍鋼(00347)、馬鋼(00323)跟重鋼(01053)全部升超過半成，鋁村股中鋁(02600)跟中國宏橋(01378)分別升3.9%及4.9%。生物科技股繼續上揚，除咗生物科技股外，醫美股亦有資金追捧，有貨喺手睇位食糊，皆因目前港股表現仍然反覆，資金輪動下，唔排除炒兩日又要抖抖。汽車股今日麻麻，長汽(02333)公布季績未見驚喜，遭花旗降級兼劈目標價，股價半日急跌12.3%，拖累整個板塊走軟，吉利(00175)、東風(00489)分別跌3.1%及2.1%。
近日批股抽手行動未停過，騰訊(00700)跟美團(03690)先後見大股東減持套現及公司配股集資，兩股均以上限價完成配股，其後股價一直守於配股價之上，總算係科技股一個正面訊號；相反中國燃氣(00384)又係配股集資，但以下限定價，較上日收市價折讓近一成，今日半日股價插水近14%，似乎市場對於中燃配股唔多受落。建滔集團(00148)大股東減持套現逾11億，又係下限定價，股價半日跌近一成。從近來幾間公司嘅配股或減持行動分析，市場始終對科技股高增長股前景較有信心，傳統股抽水後，股價表現強差人意，亦反映投資者對傳統股未來信心仍然差少少。股逆市做好，整個板塊升幅閒閒地超過2%，最勁嘅亞盛醫藥(06855)半日更升逾一成。
繼美團跟騰訊進行大型配股後，安踏(02020)亦有控股東減持股份套現，以每股作價131.48元，配售8800萬股，佔已發行股份約3.26%，配股價較噚日收市價折讓7.54%，係接近下限範圍訂價，控股股東套現115.7億元，拖累股價半日跌7%。安踏今次係控股股東自2014年10月以嚟首次批股，控股股東嘅配股行動，難免令市場揣測安踏已反映其估值，甚至係估值「到頂」。留意板塊另一龍頭李寧(02331)現價估值較安踏仲要高，唔排除徘徊高位或有機會進行配股，又或者惹嚟控股股東減持套現。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。