重磅科技股捱沽 港股動彈不得
隔晚美股個別發展，三大指數高開低走，只有道指力保不失，標指跟納指倒跌收市，納指跌逾1%，跌勢較為顯著。港股一向就跟跌唔跟升，納指咁樣掉倒插水，今日重磅科技股齊齊過堂，ATMX除咗小米(01810)公布業績前靠穩之外，其他三隻科技大隻佬都跌得甘甘哋。恒指低開262點報24688，跌幅曾收縮至156點，見24794半日高位，可惜24800支持位未能收復，沽壓隨後增強，盤中一度跌318點，見24632點半日低位，創11月10日以來新低。臨近午市跌幅再收窄，半日恒指報24698，跌252點；國指收報8848，跌80點；恒科指收報6326，跌84點。
科網股係跌市元凶，ATM三股拖低大低，阿里(09988)逼近上市新低，半日跌3.1%，報收132.9元；騰訊(00700)跌2.7%；美團(03690)跌3%，小米(01810)半日則靠穩，今日收市派成績表，廿皮邊其實可以博業績績，最多穿廿皮打靶，若然業績略為好過預期，又或者雷軍又有新點子向大家公布嘅話，悶咗咁耐嘅小米，或者有機會落鑊。當然博業績嘅嘢，一定要睇緊個止蝕位，當業績不似預期，就好嗱嗱聲止蝕離場。阿Man喺雙十一前推介嘅京東(09618)，業績前後威到盡，話咗只要上到330元，就必見360元，間尺度都無咁準，家下資金流向好明顯係捨阿里，愛京東，仲有貨喺手，食咗一半留半可以坐定定。
上星期阿Man推介嘅加熱煙股思摩爾(06969)今日急升13.7%，話咗阿爺規管加熱煙，對於龍頭思摩爾嚟講係好事，雖然相關細節仍未落實，但思摩爾就先落鑊，呢兩日北水博命掃貨，股價今日突破45企得穩，下個目標當然係睇返50元。
醫藥及醫療股早幾日炒完，呢兩日又要抖抖氣，藥明生物(02699)半日跌4.5%，係表現最差藍籌股，落到100蚊邊似乎又見值博率，不過阿Man認為觀察多一兩日，企穩一舊水先入場，最多穿100止蝕，想撈貨又唔使太急，呢期都係100至115之間炒上落。
呢期港股都係繼續炒股唔炒市，指數重磅嘅ATM未落到啲抵博嘅位都係睇定啲，反正有資金輪流炒其他板塊，都係跟住資金隨波逐流穩陣。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。