阿爺乜都要管 監管陰霾下科網股維持弱勢
美企業績雖然大部份交足功課，但市場又再擔心聯儲局縮表問題，因為有聯儲局官員再度「放鷹」，擔心一旦美債息回升，美股回報受影響，尤其美股估值唔平，稍有風吹草動，美股即見震盪，大家要有心理準備，美股唔再係上半年咁順風順水，下半年波動加劇，隨時要有心理準備大調整出現。
恒指低開36點，一度跌116點見26310點半日低位，不過恒指10日線喺26158點，點都仲守得住。其後A股回升，恒指半日最多升142點，見26569點半日高位後再回軟。恒指中午報收26374點，跌51點；國指報收9374點，點45點；恒科指復跌1%，半日跌66點，報收6792點。
藍籌股以碧服(06098)半日跌5.7%表現最差，阿爺為咗實踐三孩政策，係各方面都用政策配合，年青一代受房價太高影響組織家庭生兒育女嘅意欲，阿爺講到明要壓止房價上升，咁物管係置業後終生要付嘅費用，理論上為減輕家庭負擔，阿爺出手干預好正常，所以七個建部委作出指導後，市場難免擔心物管行業發展受到限制。尤其物管股普遍估值唔平，阿爺要拎呢個板塊開刀，阿Man唔覺得意外。
物管同教育要監管，更何況娛樂事業打遊戲機，官媒彈出彈入將評論文章上架下架，不過噚日《證券時報》發表《共同維護遊戲產業健康發展》文章，指遊戲要喺行業發展中保護好青少年，另外遊戲行業喺稅收上也應該向傳統行業適度睇齊，騰訊(00700)跌1.7%，網易(09999)復跌3.7%，嗶哩嗶哩(09626)跌3.2%。唔怕長氣再講多次，話咗快手(01024)失守250元只會進入無間地獄，股價日復日跌都唔知已幾多連陰，股價沒有最低只有更低，半日又創上市新低跌8.8%，睇成交量同走勢，暫時都未搵到個底，真係咪多手去接飛刀。其他科網股普遍腳軟，話咗喺監管陰霾下，呢批股份只會有波幅，冇升幅，暫時對呢個板塊都唔好存有太多幻想。
新能源股威咗幾日要回吐，市場擔憂PVDF需求下降，比亞迪(01211)跌2.6%；小鵬汽車(09868)跌3.5%；東岳(00189)半日曾跌6.1%。其他新能源相關股份亦見回吐，不過相對近期累積升幅，今日嘅回吐屬正常而健康嘅調整，暫時未見資金大量流出。
澳門再爆疫，濠賭股噚日急跌完，今日先低後止跌回升，不過反彈力一般，始終喺疫情唔穩定下，澳門未來幾個月嘅賭收預測只會下調，呢個板塊又淪為有波幅，無升幅之流。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。