阿爺派定心丸維穩 政策難測轉打游擊
阿爺日日同你玩突擊，早兩日瘋狂打壓教育股，轉頭又話要規管物管股，講兩講又話可能要浮發玻璃降價，總之日日有新嘢出，卒之搞到早兩日中港股市大冧檔，阿爺又覺得連環出招玩大咗，噚晚中證監急急腳搵咗幾間國際投行巨頭開會，向市場大派定心丸，試圖緩解市場對北京打壓民辦教育行業嘅擔憂，會上談及教育部門嘅政策係有針對性，無意傷害其他行業嘅公司。今日又再傳出中國繼續允許內地企業赴美上市，總之呢兩日係出招維穩，唔想中港兩地股市，喺歐美股市大好形勢下，繼續自殘。
阿爺維穩，市場點都要畀下面，恒指裂口高開747點，但已經見咗半日高位，見過鬼怕黑，見大市反彈，唔少仍然持重貨，又或者呢兩日有撈貨嘅缸邊友，急急腳食糊，令升幅一度縮水至383點，見25857點半日低位。但再傳出中國繼續允計內地企業赴美上市，再推動大市重上二萬六大關，半日升698點，恒指中午報收26172點；國指半日升300點，報9371點，之前跌得最狠嘅恒科指反彈436點，報收6879點。
藍籌股個別發展，內銀股較弱，市場仍憂慮內地企業債務問題，對內銀或構成困擾，建行(00939)跌2.3%，工行(01398)跌1.6%，如果呢兩隻恒指權重股唔係咁嘅表現，港股分分鐘已上埋26200企穩。半日反彈力最勁要數碧服(06098)，升咗接近一成，而港交所(00388)跟藥明生物(02269)呢兩隻阿Man愛股，半日齊齊升逾4%。相反百威(01876)半日跌5%，成為表現最差藍籌股。
科網股之前跌得深，今日反彈彈得甘，有中證監派定心丸，ATM半日急彈，查實大市落到24800-25000，阿Man都話差不多，只係未料阿爺出嚟維穩，呢個組合急彈。其他科網股半日普遍反彈，升5%或以上係等閒事，不過快手(01024)半日僅升3.3%，科網股中算係跌得深而又唔欠缺彈力，同年初時嘅威猛表現大相逕庭。
大市急跌後出現鐘擺效應，超賣後反彈好正常，不過阿爺出招快如閃電，政策風險難測，試問外資信心又點能夠一下子回復，資金撤出後，未必會短時間回流，暫時市況仍反覆，呢段時間都係炒股唔炒市，專心打游擊，控制注碼以防阿爺又突然出招。若然重貨嘅，更好趁反彈減磅，指數移動區間已下移至24800至27200點，即係大市唔重上27200樓上企穩，都只會繼續喺區間內上落。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。