阿爺為新能源股降溫 回吐為收集好機會
本來恒指今日係低開，有啲腳軟，好彩中國7 月PPI高過預期，國家統計局公布，7月份，工業生產者出廠價格指數(PPI)按年升9%，升幅較上月回升0.2個百分點，勝預期，按月升0.9%。A股今早靠穩，港股回咗兩日，都識得低開高走。恒指低開210點，失守10日線(26054點)兼失兩萬六，半日一度跌258點，見25920點半日低位。好彩內地股市生生性性，港股拗腰回升，二萬六跟10日線失而復得，半日最多升347點，見26527點半日高位，不過26500呢個位又邊有咁易企得穩，都需要啲時間。恒指中午報收26424點，升245點；國指升90點，報9364點；恒科指升3點，報收6700點。
藍籌重磅股見安踏(02020)跟申洲(02313)分別回吐2.8%及2.5%，國家支持運動個消息炒高一浸，都係時候整固一下。海底撈(06862)半日反彈5.8%，不過仍受制30元阻力，加上之前裂口下跌，要修復都需要時間，喺無乜特別消息下，估計後市表現都係咁上下，呆呆滯滯。科網股龍頭ATM個別發展，美團(03690)或被重罰10億美元，但好似阿里(09988)之前落實罰款，反而可以鬆一口氣，美團亦低開高走，半日反彈5.2%，反而阿里爆性侵醜聞，拖累股價逆市跌2.7%。騰訊(00700)半日反彈3.3%，其實騰訊一直表現合作，只係監管風暴下，估值無可避免要下調，但450元樓下嘅騰訊又唔係貴，長線投資分段收集亦諗得過。
中資金融股今日發力，內銀、內險跟內地券商股全部做好，只不過呢幾個板塊，一直唔係阿Man杯茶，內銀股除咗收息之外，無乜其他吸引力。至於內地券商股就好睇A股表現，不過自從阿爺開晒口話A股呢啲水平可以吸納作長線投資，市場都認同係阿爺認為第一季過熱嘅股市，尤其係炒到過晒籠嘅科技股，水份都擠壓得七七八八，呢啲位差不多，再殺落去機會唔大，資金肯入場，亦相信今年餘下時間，上市集資活動會較為活躍，對內地券商嚟講係好事。
不過阿爺話股市己屆吸引水平，亦唔代表鼓勵過度炒作，上星期炒到出煙嘅新能源股，今日又因為官媒《人民政協報》發表題為「運動式『減碳』需喊停」文章，指不能盲目追求「減碳」而回吐。相關股份普遍跌1%以上，上周創新高嘅贛鋒鋰業(01772)半日跌近5%，反而阿Man認為係急升後回吐，可以趁機買一買平貨。其他新能源股亦可以吼位，新能源始終係政策扶持嘅產業，只不過股炒得過急，阿爺出嚟降下溫，又唔等於要打壓，某啲位又唔需要過度驚慌。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。