阿爺連環出招 或提供上車機會
美股估值再高都好，美企有理想業績支撐，美股隔晚又升，標指跟納指再創收市新高，以為可以帶挈港股做返好啲，可惜A股今早又腳軟，港股表現反覆，一度回試二萬六水平爭持。恒指高開58點，報26262點，已經係半日高位，甫開市已掉頭倒跌， 一度失守10日線(26024)，見26002點半日低位，險守二萬六後喘定。恒指中午報收26206點，升2點；恒科指咁橋又係中午升2點，報6718點；國企指數中午報收9283點，跌12點。
油價跌咗幾日後隔晚回升，三桶油終於有得彈，中海油(00883)升3.7%。至於騰訊(00700)得到中國畢非德李平加持，股價彈3.6%，不過450企穩咗，下個阻力475，仲有490個裂口頂，總之上面一關又一關，要重上啡底股都唔係咁容易。長和(00001)派成績表，慷慨派息增加三成，半日股價升近3%。至於內房同物管仍受監管困擾，短期都係捱打，龍湖(00960)和潤地(01109)創52周低，半日齊跌2%。碧服(06098)唔識彈，半日跌2.7%。
新華社報道，中國營養學會昨日召開的2021年世界母乳餵養周主題研討會上，多名專家表示，配方奶粉營銷是影響孕產婦選擇母乳餵養的一大原因，需要加強對母乳代用品營銷行為的規範。阿爺今次出招輪到對付乳業股，配方奶粉股全線下跌，不過明明阿Man之前喺42樓下叫上車嘅蒙牛(02319)雖然持有配方奶粉股權益，但自己本身係產銷其化乳品，家陣阿爺鼓吹健康生活，飲牛奶呢啲唔會被打壓，股價早段跌近6%，又畀機會大家上車，阿Man就叫晒收費聊天室嘅手足喺43樓下上車，半日倒升0.4%，企得返45收市就定過抬油。雖然阿爺連環出招，有散戶高呼慘被割韭菜，但只要熟悉嘅股份知道係無辜，無厘頭陪跌嘅時候，或者係一個上車好機會。
美國總統拜登早前設定2030年美國清潔能源汽車佔銷量一半嘅目標，中金有報告指美國已將新能源汽車產業放到國家戰略層面，全球汽車電動化進程加速，產業鏈企業將從中受益，包括整車及零組 件、鋰電及材料、鋰電設備及上游原物料。另一隻阿Man推介股贛鋒鋰業(01722)創新高，高見181.8元，但半日升幅收窄至1.3%，不過只要股價企穩170元水平，贛鋒鋰業仍會以大漲小回方式向上推進。比亞迪(01211)7月新能源車銷量飆2.3倍，股價創新高見295元後見回吐，半日升幅窄到1.1%，不過有消息指比亞迪或為Tesla提供刀片電池，同樣係中線睇高一線嘅股份，有貨唔急住落車，只要守住270元，放心持有。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。