阿爺預告降準 對中港股市帶來短暫支持
美國債息回落，美股隔晚借機反彈，至於港股明日開始放復活節假，阿爺噚日就放定風，好快會降準，通常阿爺開到口，人行好大機會喺同一個周末嘅時候就落實降準，港股彈完兩日，今早繼續向好，但礙於長假期前，資金唔會積極入市，半日成交額不足500億元。其實計返條數，就算人行今降準1%，向市場投放過萬億元貸款，相對因為內地民企債務問題已蒸發咗幾十萬億元嘅資金，可以話杯水車薪，所以就算預告降準，今日中港兩地股市都唔係太興奮。
再加上阿爺由上個月中港兩地股市插到嘴歪之際，已開始放風會向市場放水，其後中港兩地股市出現強勁反彈，創A更一度單日勁升超過4%，但其後上證指數彈到3300左右，又行返轉頭。睇返過去內地多次減息降準，A股都只係升一兩日又打回原形，甚至即日高開低走，逆轉形態再級級向下，回復弱勢。原因係降準減息只係經濟太差，為免陷入衰退先放水，加上內地目前疫情惡化，供應鏈嚴重受影響，拉升物價以令通脹高企，就算真係降準鬆銀根，市場都唔會太興奮，隨之以嚟嘅，反而係憂慮內地或陷入滯脹困局。所以即使落實降準，對中港兩地股市刺激有限，升勢或僅曇花一現。
恒指今日高開88點後，一度倒跌15點，見21358半日低位，但淡友喺內地隨時宣布降準下亦有忌諱，好友反攻下大市止跌回升，半日最多升180點，見21554，其後升勢放緩，半日喺21450附近上落。目前恒指10日線下移至21765，20日線則上移至21751，兩者形成匯聚區，估計今日都好難向上突破呢個阻力區，主要係欠缺成交動力。恒指半日報收21453，升79點；國指則升48點；報7363；恒科指升39點，半日收4308。
藍籌股大玫做好，不過阿里巴巴(09988)屋漏兼逢連夜雨，唔單止畀股神老友芒格減持，外電引述知情人士透露，中紀委傳參與對阿里旗下螞蟻集團調查，半日股價逆市跌3.6%，係表現最差藍籌股。其他TMXJ全線向上，但講真升勢唔算強勁。騰訊(00700)喺380元阻力位前止步，美團(03690)亦未能升越160元阻力，而京東(09618)230元亦未能企穩。
總理李克強支持新能源汽車消費和充電樁建設，另外有日媒指中國或成電動車「世界工廠」，汽車股做好，不過阿Man只係鍾情比亞迪(01211)，只係現價又喺阻力位附近，有心買貨待大市回吐，比亞迪落返220元水平再收集，
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。