阿里健康追回京東健康升幅創新高
美股隔晚先低後高，雖然美國疫情繼續爆到九彩，但民眾好快有疫苗接種，加上市場憧憬國會好快就刺激經濟方案達成共識，美股三大指數創新高，納指跟標指仲創埋收市新高。喺美股帶動下港股今早反彈，再加上人民幣離岸價持續向上，兌美元挑戰6.5關口，港股連跌兩日後止跌反彈。
恒指高開205點，開市後升幅曾收窄至154點，見26459點半日低位，之後發力，先後收復20日線(約26517)及10日線(約26613)，最多升362點，見26666點半日高位。恒指中午報收26636點，升331點；國指則升130點，報10540點；恒科指半日報收8189點，升109點。
藍籌重磅股做好，友邦(01299)升2.2%；平保(02318)升2.3%；大笨象(00005)升1.6%，不過嚟到42元又有啲阻力，其實大笨象由低位28元彈上嚟，累計反彈升幅已經唔少，現價再追入值博率已唔高，呢幾日大笨象曾升至44元水平，可惜未能完全回補4月1日所遺下嘅下跌裂口，45元返而有極大阻力，有貨反而好好考慮要唔要趁機會鬆綁走人。至於母公司被列入黑名單嘅中海油(00883)，已連跌四個交易日，半日再跌2.3%。阿Man已提水咗好多日，咪見中海油跌咗咁多貪平入場博反彈，唔聽話手多去接飛刀，當然係中晒招兼接到一手血。
科技股今日做好，京東健康(06618)上市第二日一度再升多一成，但未能進一步突破噚日高位，半日升5.5%，睇嚟京東健康短線升得七七八八，都要時間整固一下抖抖氣，依家再追無謂，反而等回吐有100元邊先再諗上唔上車。反而同業阿里健康(00241)今日表現唔錯，成功升穿前高位破頂。阿Man喺另一個平台嘅收費聊天室噚日叫上車，短線目標26元已接近，輕輕鬆鬆又贏超過7%，連埋上星期叫趁配股震盪，低位撈嘅小米(01810)今日亦接近28元短線目標，單係呢兩隻又夠晒數買聖誕禮物。
科技股普遍做好，今日多隻由騰訊(00700)持有股份嘅騰訊契仔股見資金追捧，微盟(02013)半日升一成；同程藝龍(00780)升2.2%；華誼騰訊娛樂(00419)升6.1%，剛加入港股通嘅祖龍娛樂(09990)亦喺北水積極掃貨下連日上升，終於重上24元。仍持有祖龍嘅投資者，上次祖龍跌穿22元即如江河日下，今次同樣要留意返22元，唔穿的話好猶豫要止蝕。
阿Man過內需股係目前最能夠避開美國制裁嘅板塊，潤啤(00291)和呷哺呷哺(00520)創新高，半日分別升2.9%和6.5%；反而阿Man噚日提過嘅海底撈(06862)有啲唔爭氣，不過現價仍然守喺多條移動平均線之上，仍然可以收集，只要升穿之前幾個阻力58元，海底撈再創新高指日可待。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。