阿里業績未如人意 股價失守百四重要支持
美股隔晚又係中概股出事，公布完業績嘅阿里(09988)，隔晚喺ADR急插，拖累恒指失守二萬五大關，今早承接隔晚喺美國嘅跌勢，低開後持續偏軟，今早一度近500點，落到超過一星期低位。恒指低開385點報24934，開市已跌穿10日線(25209)、20日線(25310)及50日線(25169點)，跌幅曾收窄至242點，高見25077，但其後沽壓再現，二萬五關得而復失，最多曾跌494點，低見24825點，創逾一周低位。恒指中午收報24874點，跌444點；國企指數報8884點，跌151點；恒科指挫1.3%，報6392點。半日大市成交額761.82億元，相對近日半日成交額有所增加，沽壓都唔嘢少。
藍籌股唔使講，今日拖累恒指最多嘅，梗係剛派成績表嘅重磅股阿里巴巴(09988)，無論業績增速同剛完結嘅雙十一購物節增速都係近幾年最差，公司仲調低埋全年收入指引，股價半日插水一成，仲要穿埋140元支持位，都咪話唔濕滯。阿里插水，其餘TMX都係陪跌，騰訊(00700)半日跌0.9%、美團(03690)跟小米(01810)半日分別跌3.3%及1.2%。其他中概股普遍下跌，只有京東(09618)一枝獨秀，除咗季績好過預期之外，市場憧憬今日恒指服務公司收市後作季檢，京東有機會染藍，股價半日升5.6%，升至一個月高位，暫時破咗340元阻力，繼續向360元推進。
其他藍籌股都唔多精神，碧桂園服務(06098)折讓近一成配股集資，股價裂口低開仲要穿埋配股價，成為表現最差藍籌股。即使今日逆市升最多嘅藍籌係華潤置地(01009)傳旗下ABS獲批，半日升2.4%都好，暫時內房跟物管板塊仲未可以一試。主要係除咗配股抽水陸續有嚟之外，至大鑊係唔知幾時又有內房企業債務違約要爆煲。其他重磅藍籌如大笨象(00005)跟友邦(01299)都腳軟，半日分別跌0.5%及1.2%。
蘋果據報最快2025年推全自動駕駛電動車，蘋果概念股逆市向好，高偉電子(01415)炒高7.1%；瑞聲(02018)揚1.9%；舜宇(02382)微漲0.1%；通達(00698)彈高5.4%；比亞迪電子(00285)走高1.9%。不過阿Man暫時無乜興趣追貨，一來星期五，二來呢個概念炒作未必可以持續。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。