電力股跟航運股逢回吐吸納
美股隔晚個別發展，周二假期後復市，美國10年債息升至1.38厘，令道指回吐269點，標指亦跌15點，只有納指繼續升11點，再創歷史高位。港股表現繼續反覆，高開低走，高開後曾升至接近50日線，但受制50 日線(26566)後掉頭回落，半日倒跌逾百點收市。
恒指高開42點，早段升幅曾擴大至206點，見26560點半日高位，但家陣缸邊友都較為審慎，逼近50日線有沽盤套現，大市掉頭向下，曾倒跌188點，低見26164點半日低位。中午恒指報收26217點，跌136點；國旨則跌46點，報收9421點；恒科指半日跌62點，中午報數6825點。
重磅金融股繼續腳軟，大笨象(00005)跟友邦(01299)半日再跌1.6%及1.1%，內銀跟內險股亦無運行。騰訊(00700)早段曾高見529元，見一個月高位並回補7月26日所遺下嘅下跌裂口，可惜未能再下一城，裂口頂部又遇阻力，半日倒跌0.1%，阿Man話咗ATMX暫時都係炒range；美團(03690)又到咗阻力位附近，100日 線269過唔到，咁啱就係上半場高位，即係繼續range。小米(01810)有啲唔爭氣，雖然公司繼續回購，但股價就唔升，半日仲要跌咗2.2%。創科(00669)係跌幅最大嘅藍籌股，再強嘅股都有回吐嘅一日，半日咗5.3%，暫時係半日跌得最多嘅藍籌。相反兩隻濠賭藍籌股表現唔錯，銀娛(00027)半日升4.7%，金沙(01928)半日升3.2%，前者成為半日升幅最大藍籌。濠賭股有追捧，可能跟放寛回港易同來港易有關。
話咗電力股有排炒，逢回吐撈貨應無死，噚日軟一軟，今日又嚟料，主要係受內地綠色電力交易試點正式啟動。阿Man最睇好嘅華潤電力(00836)，半日升2.5%，升幅唔算大，因為風電股表現更強勁，普遍升3%或以上，風電龍頭龍源電力(00916)，半日更升6.4%，細細粒嘅大唐新能源(01798)更爆升15%。
噚日阿Man喺旗下嘅炒股聊天室叫吼位海豐國際(01308)，半日升咗2.4%，其他航運股全線做好，升幅由1%至接近6%不等。資金繼續追捧航運股，係因為預料航運股今年餘下時間有排炒，而美國啱啱有報道指「塞港」問題難以解決，業內更估計或會延至明年年底。即係航運費同貨櫃費呢啲海運費用都唔使旨意落返嚟，呢個板塊同電力股一樣，逢回吐可吸納。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。