電動車股裂口高開要抖抖
美股喺美企陸續公布季績之際愈戰愈勇，隔晚道指跟標指齊創新高，而納指再升逾百點，升幅接近1%。數據顯示，目前已公布財報嘅117家標指成分公司中，84%盈利超出預期。市場普遍預計標指成分股第三季度嘅利潤增長率將達35%。而嚟緊將有大型科技企業公布業績，而有分析預期標指中嘅科技公司三季度營收增速約19%左右，跑贏該指數成分股平均水平，不過市場預期呢啲企業嘅收入增速，將會喺第四季開始放緩。阿Man預期喺科技企業公布業績後表現理想嘅話，可支持美股更上一層樓。
至於港股亦步入業績期，目前大市喺二萬六水平爭持。恒指高開102點，報26234點，創9月8日以嚟高位，不過開市後掉頭向下，至中午臨收市前一度跌138點，見25993點半日低位，目前正於二萬六關爭持。恒指中午報收26028點，跌103點；國指報收9251點，跌71點；恒科指則跌97點，報收6646點。半日成交縮水至615億，靜過太空，成交愈玩愈縮。
美股點計都係熱鬧過港股，Tesla隔晚股價狂升12.7%，股價升逾1000美元，市值突破1萬億美元(7.8萬億美元)，帶動港股呢邊嘅電力車股炒上。龍頭比亞迪(01211)除咗跟住大圍炒上，公司宣布旗下產品加價兩成，今日裂口高開後再創上市後新高324.6元，半日升幅回順，半日升3.6%。理想汽車(02015)再創本港上市新高，半日升6.8%；小鵬(09868)急升11.4%。除咗電動車股做好，成條Tesla產業鏈亦做好，力勁科技(00558)半日升16.4%，贛鋒(01772)。不過上述股份唔少都裂口高開，點都要抖抖氣，有貨嘅不妨拎部份出嚟食糊，鎖定利潤幾時都無壞。
至於啤酒股今日亦有資金追捧，因為有券商報告指啤酒業在本季或明年初，會進入加價潮，主要係因為成本上升。不過幾隻啤酒股抽高之後，都喺阻力位前停步，要買貨似乎唔使急。煤碳股跌勢未止，內地動力煤期貨持續下跌，已跌第五個交易日。阿Man講過煤炭股難炒，睇嚟都要跌煤炭價格調整一下。內房股講咗暫時仍要捱沽，始終房產稅實行呢個消息都較為負面，暫時都要時間消化呢個負面消息，即使內房股調整到呢啲位都幾吸引，但板塊氣氛唔理想，眼看手勿動。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。