靠夜期挾淡倉 遺下更多上升裂口
美國喺議息會議前夕仍然偏強，雖然周二晚市場一度憂慮財政部再發債，或抽走市場資金，令美股早段下跌，但始終市底偏強，最終三大指數仍向上，標指更創9個月新高。再者，有消息指美國國務卿將於短期內訪華，市場憧憬中美關係破冰，帶動中概股急升，ADR及夜期重上20天線(19241)。不過內地5月出口差過預期，令港股高開低走，半日升幅收窄。
恒指高開227點，早段升幅曾擴大至311點，見半日高位19410，成功收復20天線，其後升幅收窄至111點，見半日低位19210後，重返20天線暫時守住。恒指半日升185點，報19285；國指升65點，報6545；恒科指則收3911，升77點。雖然港股今日繼續反彈，但半日成交額竟進一步縮水至457.24億元，咁嘅成交難怪個市高開低走。
藍籌股大多向好，但比亞迪(01211)半日跌0.7%，中升(00881)更跌4%成為表現最差藍籌股。金融股造好，大笨象(00005)跟友邦(01299)半日分別升1%及1.5%，港交所(00388)半日升1.4%。隔晩反映中概股嘅金龍指數急升，港股呢邊嘅科網股普遍向上，騰訊(00700)、阿里(09988)跟京東(09618)半日都升逾1%，美團(03690)更彈2.5%。
有消息指中國大型商業銀行正評估進一步下調人民幣存款利率，其實之前阿爺都溫馨提示咗國有銀行要調低利率，換嚟嘅係人民幣匯價下跌。不過內地經濟復甦不似預期，唔放下水又唔掂，總之就係兩難局面，否則內地股市近呢個幾月又點會咁疲弱。銀行股借勢反彈，無論國有銀行或商業銀行，半日隨大市向上，升幅由0.4%至2%不等。
電池股今日表現較差，逆市下跌，主要係龍頭股寧德時代被大行調低目標價，指公司或面對產能過剩問題，股價急跌拖累港股呢邊嘅電池股逆市下跌，不過跌勢尚算溫和。至於噚日再被沽空機構狙擊嘅創科，再一次反駁沽空報告，股價半日反彈5%，係表現最好藍籌股。
港股繼續技術反彈，不過成交方面真係強差人意，只可解釋為借消息挾淡倉兼繼續技術反彈。暫時10天平均線已企穩咗三個交易日，嚟緊就要睇埋今日能否守住條20天線，若能守住，有機會進一步向上挑戰250天線，只係咁嘅成交，要去進攻呢個大佬位唔容易，有心挾淡，可能又係靠夜期去發動攻勢，每日就裂口高開，遺下更多裂口，顯得反彈勢頭更空虛。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。