騰訊批股後跌足半年不會歷史重演
隔晚美股個別發展，標指續創收市新高，雖然重磅科技股做好，但納指仍要跌9點散場。港股隔晚夜期跟ADR，因為騰訊(00700)大股東減持聲應而下，以為港股今日死得就大錯特錯，所謂今時唔同往日，如今由北水主導嘅港股，又點會因為騰訊批股就咁死落去。
恒指低開70點，開市後曾跌87點，見28587點半日低，之後拗腰彈，重上20線(28722點)，其後喺A股做好帶動下，一度升266點，見28947點全日高。恒指中午收報28913點，升238點；國指報11090點，升19點；恒科指升39點，報收8491點。
2018年騰訊批股後跌足半年先成功尋底，今次批股裂口低開見614元，半日就見咗個底，雖然阿Man無水晶球，唔知今日係咪真正見咗批股後嘅底，但今次騰訊批股嘅估值，遠較2018年批股時低，仲要上限訂價，兼且機構投資者全數接貨，基本上折讓咁少，騰訊就梗係隊唔落，半日最多跌2.5%，中午收市跌唔夠1%，想執平貨問過北水先。騰訊低開後，北水喺620元樓下積極掃貨，騰訊無幾耐已重返620元水平。其實大股東三年又三年減持又如何，只要基本因素無變，以騰訊現價預測市盈率得嗰三十幾倍，批股亦唔會隊得冧個價。
其他藍籌股以友邦(01299)表現至勁，多得大摩吹奏，魔笛追魂下股價半日升5.4%，真係無乜幾可，留意友邦喺98至100元阻力較大，短炒嘅缸邊友，擔心就睇位食糊。創科(00669)創新高，半日升4.6%；蒙牛(02319)半日亦升3.4%，但45元未知企穩未，企唔穩又係窄幅上落。
物管股今日炒細唔炒大，次一線嘅物管股突圍，建發物業(02156)創掛牌後新高，半日升近一成。新城悅服務(01755)亦創新高，半日升逾3%。寶龍商業(09909)為少數以商業物管為主嘅物管股，半日亦升6.8%。反而兩隻龍頭碧桂園服務(06098)及雅生活(03319)，半日僅升0.4%及0.7%。不過要阿Man揀呢個板塊嘅心水股，都係龍頭優先考慮。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。