高追當炒板塊需嚴守止蝕
美股隔晚無啦啦畀財長耶媽嚇親，話確保經濟唔會過熱，有可能需要上調利率，此話一出，嚇怕美股缸邊友，令大型科技慘遭拋售，一度令道指盤中下跌超過300點，後來知衰即出嚟補鑊，澄清自己並無預測或建議加息，亦無預期總統拜登推動刺激計劃必然導致聯儲局有需要溫和上調利率。與此同時，聯儲局主席鮑爺跟其同僚重申堅持寬鬆立場，總算令急跌嘅美股跌幅收窄，道指收復失地倒升收市。至於港股今日低開後回穩，不過市場仍關注印度疫情發展，耶媽雖然澄清有關加息建議，但亦缸邊友頓生戒心，港股好淡爭持，始終未能企穩100日線(28586)。
恒指低開129點，開市無耐跌幅曾擴大至231點，見28325點半日低位，但嚟到呢啲水平，未見沽壓再增，反見有買盤趁低吸納，大市止跌回升，曾倒升120點，見28677點半日高位，可惜未能企穩100日線，大部份時間好淡拉鋸，暫仍受制百日線。恒指半日收報收28559，升2點；國指午造10784，升18點；恒生科指跑輸大市，半日跌125點，報收8158。半日成交今日較上日略增，不過市場仍靜待明日北水回歸，會否為港股帶嚟一點力量。
藍籌股個別發展，當中表現最突出係恒生(00011)，半日升3.3%，為最大升幅藍籌，其他內銀亦見反彈，建行(00939)跟工行(01398)分別升2.2%及1.6%。不過ATMX四大巨頭只有小米(0180)靠穩，騰訊(00700)、阿里(09988)跟美團(03690)各跌1%或以上。美股嘅科網巨企都腳軟，港股呢邊嘅代表又豈能獨善其身。
國際油價升至7周高位，三桶油向好，連其他資源股走高，噚日阿Man喺收費聊天室推介嘅江西銅(00358)半日亦略升1%，其他資源股都係咁上下，升得少過2%，噚日買咗貨，今日亦無乜肉食，只有畀啲耐性等收成。
波羅的海乾散貨指數連升十四個交易日，累積升幅達47.5%，航運股續有資金追捧，預期喺游資未離開呢個板塊下，航運股續有炒作，而大行又相繼調高不同航運股目標價，有貨喺手唔急食糊，無貨追貨則好好控制注碼，嚴守止蝕。家陣呢啲市況，強勢板塊侷住要追，但追貨緊記入場前要設定止蝕，嚴格執行，一有唔對路要即跳車，切忌短炒不成又變長線
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。