快手業績唔算差
上個月上市嘅重量級新股快手（1024），周二公佈上市後首份業績，噚日股價顯著下跌12%，盤中曾見261.4元，但未有被質低至月初上市後低位250元。集團全年錄得1,166億元（人民幣．下同）虧損，每股虧損125.25元，期內營業額則按年增長50.2%至587.76億元。撇除優先股公允值變動等因素，經營虧損仍達79.49億元，去年同期利潤10.34億元，扭盈為虧，但較市場預期虧損93億元理想。
表面睇快手錄得巨額虧損，主要係上市為咗吸引投資者入場，以低價發行可轉換可贖回優先股，公司上市後股價急升，喺會計賬面上要計入1,068億元相關虧損。其實呢類優先股賬目虧損，喺新經濟股IPO中常見，亦屬意料中事，只不過市場上標題黨眾多，見到今次份業績虧損較上年度擴大近五倍，噚日嚇到跳車打靶亦好正常。
其實快手今次份業績唔算失禮，只係市場太多盲毛唔識解讀，快手噚日少少被過份拋售，大戶亦樂於見到散戶人踩人而袖手旁觀，並唔急於入場，加上快手仍未被納入港股通，即使內地有投資者有意入場，亦無計可施。但快手發展前景仍理想，留意管理層稍後會否提供最近毛利率指引，去年第四季毛利率按季增長7.9%至47%，係唔錯嘅數字。現價已逼近前低位250元，現水平入場，跌穿250打靶，博股價重返幾間大行目標價，暫時最牛嘅瑞銀睇430元，最保守嘅野村睇333元，攞個中間數再打埋九折，都有343元，即係用不足6%博上面近三成升幅，除笨有精。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。