滔搏估值平過安踏李寧一大截
滔搏（6110）上月宣佈已完成大股東嘅股份分派，當中持股20.2% 嘅管理層及持股16.2%嘅退休管理層已自願承諾進行股份鎖定，市場對呢批股份潛在配股嘅擔憂，較早前嘅股價表現已反映。由於呢次嘅大股東股份派發，令滔搏股價表現喺上個月遠遠落後於同業李寧（2331）及安踏（2020），兩業界龍頭股價尋日再創新高，而滔搏股份創12.44元新後，喺12元水平附近整固，待資金再進場，炒作應可繼續。
其實，從Nike嘅業績已可反映幾個利好滔搏因素，包括Nike大中華區銷售增長19%及EBIT升28%；其次係Nike嘅11月渠道庫存已回復至正常水平；而Nike管理層將其2021年度全年銷售目標，由高單位數調升至低雙位數 (上半年為4%)，毛利率指引亦有所擴張。隨住Nike加快轉型至直接面向消費者（DTC）策略，Nike積極與各策略夥伴展開直接合作，以捕捉需求，預計Nike喺全球推出更多均價更高嘅產品，滔搏可從中受惠。
自從內地「十四五」規劃落實後，零售及消費內地經濟喺疫情復蘇後嘅核心支柱，滔搏作為國際一級體品品牌嘅最大經銷商，其市佔率足有16%，為行業龍頭。集團喺國內嘅銷售點以萬計，其中八成為自營，其餘則為加盟店。其八成銷售點，98%為單一品牌，其餘為「Topsports」，銷售包括Puma、Vans以及Timberland等品牌，銷售產品組合盡為國際一級品牌。
滔搏早於去年10月底公佈截至8月底止嘅中期業績，收入為157億，按年跌7%；純利則為13億，按年都跌11%，主要係受到上半年疫情打擊所致。不過，集團同一時間宣佈派0.12元人民幣的股息，以及0.40元的特別股息，對股東都算有情有義。滔搏於10月至11月嘅銷售相較9月見增長，同時店舖折扣亦見持平，意味毛利率穩健。基於集團與Nike及Adidas有前所未有嘅強大線上/線下渠道合作，雙十一銷情亦見理想。
滔搏現價預測市盈率約24倍，遠低於安踏58倍及李寧73倍預測市盈率，雖然滔搏僅為經銷商，相對市盈率應較低，但考慮到滔搏2021下半財年至2022上半財年將實現強勁的銷售和盈利提升，並繼續受惠於內地運動服裝行業的結構性增長，未來一年將產生良好回報，而不少大行更視滔搏為今年領袖內需股之一。現價買入博炒上14.55元，對應30倍預測市盈率，跌穿11元止蝕，夠晒值博率。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。