9月美股或作深度調整 港股估值平未必跟到足
9月2日，部份時間有陽光及炎熱，間中有幾陣驟雨。市場期待嘅美國就業數據表現遜色，即係話美國又唔係太急住要收水，美股個別發展，標指跟納指保持升勢，納指再創收市新高；道指則跌48點。標指已連升7個月，過往歷史往績顯示，9月通常係標指表現較差嘅月份，炒開美股嘅缸邊友要提高警覺。
若然美股喺9月真係作出深度調整，咁港股又點算？喺過去半年，美股屢創新高，但港股完全跟唔上，遠遠落後，港股已唔似以前，跟足美股步伐，反而更受A股表現影響，咁美股若然喺9月作深度調整，港股又會唔會跟住插水？內地近日發表多項經濟數據，反映內地經濟增速正放緩，主要係監管風暴上演嘅影響。由於8月監管風暴變本加厲，預期未來兩三個月數據表現持續疲弱，內地經濟喺下半年下行壓力更大，難怪當美國收入高唱入雲之際，內地反而講緊隨時有機會放水。
而喺一連串監管行動下，中資股估值已大幅下調，由年初極為離地嘅估值，經過半年時間調整，唔少科網股估值已變得合理甚至吸引，喺現水平再大幅下行風險已大大降低。雖然一旦美股大幅向下震盪，全球股市難免被拖累，但港股喺估值便宜下，即使被拖低，反而係吸納好機會，所以缸邊友好趁呢幾日反彈至26000水平，盡量減磅套現，準備現金為抄底作準備。
過往美股大跌前，必有外資大鱷當港股係提款機，大手沽港股、期指同質低港匯，興風作浪。但如今中資已取代外資喺港股主導地位，外資有中資呢個強大對手，就算港股跟隨外圍插水，但只要有北水入場，港股未必如往常跟足外圍股市走勢，所以9月份美股真係有乜依郁，港股受影響震盪，反而可以追隨北水入場撈貨。反而古天后更關心嘅係，內地監管風暴何時完結，大灣區理財通幾時推出，中港兩地幾時完全通關，對港股後市發展有更大影響。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。