9月份仍以短線操作為主
美股隔晚自高位回落，不過回吐壓力有限，變動唔大。至於港股繼續反覆，但自周一期指結算以嚟，連彈第三日。恒指略為低開7點，早段曾低184點，見25694點半日低位，10日線(25497)收復後穩守，喺A股低開高走下，反覆做好，重上20日線(25881)及26000，半日最多升222點，見26101點半日高位，升至兩周高位。恒指中午報收26038點，升159點；國指升129點，報9313點；恒科指則升118點，報收6725點。
A股低開高早，反覆靠穩，藍籌個別發展，自7月裂口下跌，持續喺低位整固嘅海底撈(06862)半日升6.9%，不過又差不多逼近阻力位，冇貨梗係追唔過。喺8月份升幅最大藍籌信義光能(00968)則見回吐，半日跌6%，要睇18守唔守，唔守要回深啲。藥明生物(02269)則回吐3.2%，落到115樓下，又係可以試下收集，110至115買返啲。
雖然內地對科網股監管未有停止，但相關企業表現合作，盡量配合監管要求，而市場對相關監管亦已接受並開始習慣，事實上呢類股份經過深度調整後，現價估值已回落至較合理水平，開始再吸引資金入場。不過大部份股份雖似見底，但暫仍未擺脫區間上落格局，升嘅時候唔建議買貨，留返回調時搵位博炒上落。
內地上月建築業PMI達60.5，按月升3個百分點，並重返高位景氣區間，基建股有追捧，板塊內股份普遍升4%或以上，中交建(01800)半日更升近一成。對於呢個板塊，已長期橫行咗一段時間，但過往經常係急升後又唔見影，阿Man就無興趣追入，寧願睇返啲重型機械股好過。
暫時仍然係資金輪動，大市成交未見明顯增加，資金都係喺唔同板塊之間穿梭，當然受惠國策嘅板塊表現較強，而指數雖重返10日線20日線，但暫未見進一步向上突破動力，而26000點阻力唔易突破，港股未似轉勢向上行單邊市，睇嚟9月都係繼續打游擊，以短線操作為主。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。