港股能否扭轉弱勢還看A股
7月11日，部份時間有陽光，有幾陣驟雨，早上局部地區有雷暴，日間天氣酷熱。鮑席出席國會聽證會，口吻偏鴿，市場對9月開始減息周期憧憬升溫，今晚將公布通脹數據，市場喺數據公布前仍然亢奮，美股隔晚升勢勁，納指跟標指再雙雙破頂，再創收市新高。美市收市，道指升429點或1.09%，報39721；標指升56點或1.02%，報5633；納指升218點或1.18%，報18647。
重磅科技股繼續受捧，蘋果預期iPhone16今年出貨量或有一成增長，市場亦睇好AI熱潮下，換機潮將帶動銷量上升，其股價隔晚再升1.9%，連升七個交易日並再創新高；Nvidia再升2.7%，逐步向前高位推進；至於Tesla亦搭上AI快車，其AI人形機械人最快可於明年底開賣，股價於不足一個月內，大幅抽升四成，股價隔晚再獲高盛調高目標價，股價再升0.4%。
高盛資產管理睇好美國小型股於下半年反彈，因為相對重磅股，小型股估價吸引，對有意尋求大型股以外投資機會嘅散戶，未來增長潛力或優於中型及大型股份，而利率下降亦令小型股受惠。不過，細摩根大通交易部門嘅美國市場情報主管Andrew Tyler警告，美股喺周四通脹數據公布後走勢恐波動，佢提到期權市場顯示標指可能上升或下跌0.9%。經濟師估計美國6月份消費物價指數(CPI)按年升幅放慢至3.1%，核心CPI按年增幅料維持於3.4%。
鮑爺一向被視為對利率政策偏鴿，隔晚喺聽證會表示，短期內中性利率似乎有所上升，不過喺中性利率下，經濟可以喺通脹穩定情況下擴張。佢同時表示，聯儲局無需等到通脹降至2%下先至減息，對於通脹已經回落，佢確有一定程度上信心，但自己仍未準備好對通脹進展已經有足夠信心；對於減息問題，佢暫時未有具體嘅通脹數字標準。呢番說話，市場解讀為聯儲局無需等到通脹降至2%以下先開始減息周期，美股受刺激大升亦係理所當然。美滙指數最多跌0.13%，至104.995，重返105水平之下。不過美匯指數回落，並未對日圓匯價帶嚟支持，路透報道，日本央行7月底會議料調低今年經濟增長預測，惟未來數年通脹展望將維持約2%，日圓最多跌0.32%，至161.83兌每美元。
雖然金龍指數未有跟隨美股上升，反而跌破6000點，微跌0.04%，但港股ADR及夜期回升過百點，今早黑期亦升百點，重返17600水平附近，預恒指高開，但會否一如昨日高衝回落，則要睇睇噚日成為阻力嘅10日線(17762)會否有發揮作用，料今日恒指10日線將略為下移至17700水平。留意噚日成交額回升至過千億元之際，空軍再度活躍，沽空比率回升至18.64%，未知今日會否有挾淡倉舉措。若然純挾淡倉，空軍完成回補，升勢能否持續仍有待觀察。今日支持位仍然係100日線(17456)，跌破下試前低17376點。至於阻力仍然係10日線以及20日線(17917)。港股能否扭轉弱勢，A股升跌將成為關鍵。
利益申報 : 筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。 免責聲明 : 本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。 版權聲明: 本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。