10月10日，多雲，有一兩驟雨。以巴衝突升級至戰爭狀態，周一早段美股受壓，不過油價急升帶動油股及國防股逆市上升，道指低開150點後反覆回升，收市回升近200點，升197點，標指升27點；納指則升52點。三大指數已連彈兩日，VIX回落至17.7。暫時美股仍有機會再試低位，將會係一個理想嘅切入點，雖然明年經濟放緩，但息口會因此而持平其至向下，而科企喺過去呢年幾一直裁員，大大減低開支，加上通脹受控下，企業成本有望穩定甚至下調，預期明年美企業績會有改善。
即使聯儲局之前仍不斷放鷹，主要係加息周期近尾聲，但未能就打壓通脹放鬆，所以不斷出口術，令熱錢收歛，當市場開始冷卻，近排聯儲局開始無咁鷹，雖未至於放鴿，但見市場唔再過熱，自然唔需要太口硬。美匯指數回落至106水平，離岸人民幣反彈至7.28水平，美股先跌後回升，但中概股反彈力麻麻。噚日A股假後復市，被外資狂沽，錄得70億元北向資金淨流出，可見資金對A股仍然係要錢唔要貨嘅態度。
黃金週歸來，內地出遊數據表現唔錯，已回復至2019年疫情前水平，但A股市旅遊股假後即插水，擺明係趁好消息出貨。雖然呢幾日開始有內地分析員唱好第四季A股表現，但身體卻很誠實，A股再三穿底，沒有最低，只有更低。
A股每況愈下，外資拋售過後，依家係輸到陸資拋售，噚日北向資金沽出70億元A股，正好反映呢個情況。由於噚日上半場港股因颱風休市，其實外資上半場係冇參與A股，咁即係沽貨嘅都係自己友。古天后已多次提及，內房債務爆雷，呢條產業鏈出事，係會拖累整個內地經濟，內地經濟於疫情後復常仍未能復甦，完全都係畀內房嘅債務問題所拖死。內地經濟環境有幾差，官媒只會絕口不提，但連陸資都要錢唔要貨去沽A股，有錢嘅內地人千方百計抱住資金往外跑，其實大概都估到內地究竟發生緊乜嘢事。
至於噚日港股受颱風影響只有半日市，恒指微升31點，連升3日，成功企穩10日線(174737)上收市ADR再升約50點，黑期今早升過百點重上17600點水平樓上，預告今日指數高開，並再次向上挑戰20日線阻力約17700點關口。升得穿並收於其上形成4連升嘅話，代表短期走勢好轉，有力進一步上試18000大關。反之，若繼續受制20日線回落，反映市底持續偏弱，稍後要再下試17000關。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。