尋找估值偏低中科企 聯想回A前必獲重估
1月27日，大致多雲，日間部份時間有陽光，今明兩日仍溫暖，注意周五早上氣溫稍涼。聯儲局今年首次議息，美股三大指數隔晚回落，主要係拜登提出嘅刺激經濟計劃難望短期內通過，最快可能要到3月中旬，喺上一輪法案嘅失業救濟措施到期時能實行。美股散戶力量實在不容忽視，之前被沽空機構狙擊嘅GameStop，喺社交平台獲散戶極力唱好，刺激股價年初至今已升7倍，可見散戶跟機構投資者惡鬥下，傳統大戶亦被挾爆。
而美股踏入業績期，大晒士嘅通用電氣(GE)跟3M都交出理想成績表，隔晚股價逆市向上。雖然近日美股多個現象均與千鿋年科網股泡沫爆破前似曾相識，但估頂摸底呢啲古天后極為反對嘅行為千祈咪搞，一日美股唔轉勢，爆煲股災都係得個講字，更有美股專家指美股牛市尚未結束，標指更有機會升破5000點先見頂，即係較標指現水平，仍有超過三成上升空間。
熱炒股繼續尋頂，資金喺不同板塮之間輪動，雖然噚日恒指顯著調整，但個別股份仍獲北水追捧。不過呢兩日缸邊友嘅注意力轉移至剛開始IPO嘅新股快手，快手除咗係內地手機用戶繼微信及抖音後，另一不可或缺嘅app，以每日激活用戶數字驚人，連騰訊(00700)亦擔心其威脅，可見快手上市將有幾受歡迎。預期呢間廣為內地民眾熟悉嘅公司，喺港股上市後，最快喺十個交易日內獲納入恒科指，而恒綜指亦坐定笠六，即係快手好快會被納入港股通，難怪剛開始招股，孖展額已爆數爆到七彩。
快手有望成為今年凍資王之際，阿爺竟然放風有意放生螞蟻集團，螞蟻上市大有機會在年內捲土重來，若然重啟上市成功，肯定係今年嘅集資王兼凍資王。就算螞蟻今年趕唔切登陸港股，多間內地頂級科技企業，都會齊集港股上市，港股定必為北水境外最大投資主場。而內地資金相對外資更為了解國情及熟悉內地市場，未來北水將會繼續主導港股，而中資股將繼續得到價值重估。
不過經過去年北水喪買多隻中科企業，市場上估值偏低嘅中資股已買少見少，較早前已宣布將回A嘅聯想集團(00992)，現價市盈率只有22倍，咁嘅估值回A實在失禮，同類股份如小米(01810)現價市盈率65倍，而同類喺A股上市嘅公司，PE動軋過百倍。大部份投資者對聯想的認知，普遍仍停留喺PC霸主嘅定位上。當市場認識到，聯想無論是創新實力，或是打造高利潤率、高成長潛力業務上均已蓄勢待發，聯想定必被重估，股價翻一番先回A亦好合理。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。