AI概念今年熱炒 趁調整吸納相關股份
2月8日，大致多雲，有一兩陣微雨，日間部份間時有陽光，間中吹強風。美股早段偏軟，主要係又有聯儲局官員放鷹，但鮑爺其後指通脹開始放慢，市場相信利率唔會再大幅上升，帶動美股回升。三大指數倒升收市，道指升265點；標指跟納指分別升52點及226點。至於ADR變化唔大，無乜上落。短線嚟講，港股已步入調整期，雖然恒指跌逾千點後，嚟到21000水平暫見支持，但未能重上20日線，暫時仍然喺調整浪當中。
噚日表現最突出嘅藍籌股，當然係百度(9888)，單日上升逾一成半，主要係公司公布集團嘅ChatGPT項目，確認名字為「文心一言」，將會喺3月份完成內部測試後，再公開發布。百度嘅聊天機械人都未出台，但市場先興奮，可見今年AI概念將會係一個主要炒作主題。
市場咁關注ChatGPT，係因為ChatGPT冒起，標誌住人工智能(AI)技術喺一般應用層面愈趨普及，未來有機會改變好多行業生態，甚至如科幻電影劇情般，取代人類。目前有就ChatGPT撰寫研究報告，該報告將此技術評價為「可讀性強」、「流暢度好」，又指呢種AI技術能夠「顯著提升效率」，而且用戶體驗感也較為順暢。
與此同時，勞工密集型工種亦因為AI出現而迎來重大變革。南韓電商巨頭Coupang為實現扭虧為盈目標，計劃喺其物流中心使用「機械人軍團」以降低經營成本。Coupang日前展示公司位於大邱市的訂單交付中心，該中心採用大量外形像書架嘅自動機械人，每一個能夠運送1000公斤貨物，能夠像掃地機械人咁靈活移動，並且會自動配合倉務員運送貨物。依靠呢批機械人，倉庫工人勞動負荷減輕咗2/3。
今年有望成為AI發展嘅里程碑，相關技術將變得「觸手可及(Tangible)」，並且係一個長遠而言不容忽視嘅投資主題。除咗港股嘅百度之外，美國嘅微軟、蘋果公司(Apple Inc.)等科網巨頭已紛紛加入AI戰場，宣布其AI發展計劃。對於投資市場而言，AI風潮亦係一大機遇。而隨着AI產品冒起，相信會惠及大數據、網絡安全等板塊。遇上目前港股嘅調整浪，正好係一個買入相關概念股嘅好機會，港股呢邊首選百度，留意騰訊控股(700)、阿里巴巴(9988)及華為都有人機械人對話專利，即係呢幾隻股份，都可以趁本論調整伺機買人。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。