大市要再上 靠ATMXJ繼續發力
1月21日，早晚清涼，日間有陽光，今晚大致多雲，有幾陣雨。隔晚美股表現反覆，先升後回，三大指數尾市急跌，以全日低位收市。市場憂慮通脹升溫下，聯儲局收緊貨幣政策。道指早段曾升461點，但其後反覆偏軟，尾市急跌，收市跌313點；標指跟納指分別跌50點及186點，納指較去年11月高位已跌逾一成，繼續陷入技術性調整，更有陷入熊市嘅危機。
美股連日下跌，散戶對股市樂觀情況減弱，近日更從科技股瘋狂嘅狀況中逐步冷卻，更開始感到疲倦，尤其由「Z世代」年輕投資者主導嘅「網紅股」熱情急劇減退。對於近日由加息引起嘅市場波動，古天后又唔係太擔心，加息大大話話講咗成年，只要加息係循序漸進，唔好加得咁急同咁密，基本上市場已有心理準備，近日美股嘅下跌，係高增長股估值重評，加上部份資金從股市流入債市，對後市又唔使太悲觀。美股喺舊年持續上升，嚟到今年開季，尤其喺聯儲局開始收緊貨幣政策下，股市調整亦屬正常，對後市又唔需要太悲觀。
至於港股近日開始唔多跟美股走，表現較為硬淨，美股大跌，港股回吐，但未有跟足跌幅，只要美股穩定，港股則做好，噚日就單日急升逾800點，一口氣收復100線(24608)，並逼近25000水平，挾爆淡友。港股由今年開局至今，表現都算唔錯，至於港股由去年2月展開跌浪，衰近一年之後，目前係長期跌浪之中嘅反彈，抑或已成功扭轉跌勢，從新步入牛市，仍需拭目以待。
不過港股今年開局總算有個好開始，恒指先後收復多條移動平均線，但要回復強勢，收復250日線(26851)係必需嘅，目前距離250日線仍有漫漫長路，首要係企穩條100日線，24600水平守得到，再收復二萬五失地，一步步向26000進發。而嚟緊港股要再進一步轉強，重磅科技股定必要出多幾分力，噚日ATMXJ急升，今日唔排除有啲回吐，但只要仍守住關鍵支持位，如騰訊(00700)企穩450；美團(03690)唔再失守220；阿里(09988)企穩120；小米(01810)穩守18；京東(09618)唔再落去280樓下，咁後市進一步向上仍有可能。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。