【盤房來料】 美國CPI數據公布前買賣兩閒(101126).docx

美國CPI數據公布前買賣兩閒 美股上周大跌後投資者趁低吸納，雖然Nvidia舵手黃仁勳受調查，但其他科技股及AI股有資金撈底，加上國際油價滑落，美股周一大幅攀升，三大指數急升，當中納指更曾升逾3%。道指高開357點後，升幅擴大至最多1288點，最高報52574，收市道指報52389，升1104點或2.15%；標指升172點或2.35%，報7549；納指升673點或2.74%，25253。相反，資金從中概股流走，反映中國概念股表現嘅金龍指數跌1.32%，報5766。NQ強勁反彈，較夜盤低位計，彈咗超過一千點，不過28000呢個位又唔係話咁易企得穩，個NQ短線支持喺27500-27600，上面阻力大約係28100-28200，連續幾日大波幅，估計今日都應該定返啲，唔再成千點上落。 重磅股中，Nvidia行政總裁黃仁勳向員工承認有婚外情，皮褸黃出軌由股東埋單。公司董事會鑑於有報道指黃仁勳為外國情報行動目標，故宣布成立由獨立董事組成委員會，聯同外部律師展開調查，皮褸黃承諾全力配合，調查期間繼續領導公司。喺唔少人眼中，黃仁勳等於NVDA，NVDA等於黃仁勳，佢咁搞一搞，股價短期難免受壓，幸好暫時個170仲頂得住，170-180呢啲價，要儲貨就係呢個範圍，雖然阿Man未爆呢隻外遇鑊前買貴咗，但長線嚟講，只要公司繼續掌握全球最先進晶片技術，股價回歸去合理價格並非難事，暫時唯有再坐一會。NVDA股價一度挫近9%，收市跌幅縮至4.3%，為跌幅最大道指成份股，盤後股價變化不大，暫於180水平附近上落。MU嘅短炒貨食咗糊後，擺返個680同660買盤，最後影都無，暫時價上返720樓上就唔追，買盤繼續放住先。SPCX重新喺136上車似乎做啱咗，暫時股價上返140樓上，另一個124嘅GTC買盤繼續，反正有心建倉長線持有，唔心急追貨，總之手上先備一注貨底，再有震盪下面加注。MSFT短炒貨清倉後，無乜靚位上車，其實530-540撈返係可以，但有平貨底就唔刻意追貨。至於AMZN、GOOG及META繼續持有，經歷過上周美股嘅小型股災後，暫時個短炒倉防守能有返咁上下，進可攻，退可守。 雖然AI股見反彈，不過基於相關股份交易拆倉，花旗下調美股及環球科技板塊投資評級至「中性」，同時提高英國以外歐股評級至「增持」，理由係區內會受惠油價回落。該行策略員Beata Manthey稱，對AI股前景仍樂觀，但在市場穩定下來及盈利預測修訂之前，可能出現進一步拋售。大摩策略員Michael Wilson則認為，標指回調正進入尾聲，接近其下行目標，相信年底前將出現反彈。建議唔好等待大市觸及完美低位才入市，應要喺未來數周增持估值大幅下調且展現強勁每股盈利嘅優質周期性股票。細摩策略員Dubravko Lakos-Bujas亦睇好，維持標指今年底目標8000點，即較上周五收市仍有8.5%上升空間，認為上周冧市主要係由去槓桿化觸發，投資者悲觀情緒或已接近極端水平。不過，佢提到短期市況依然存在不確定性，例如龐大新股集資及數據中心建設前景未明，地緣政治及油價走勢亦可能左右聯儲局12月議息結果。今晚美國公布通脹數據CPI，呢個數據或會左右聯儲局12月議息決定。噚晚10年期債息曾轉升3.2個基點，至4.888厘。美滙指數一度回落0.65%至101.64，日圓上揚0.52%至157.67兌每美元。 港股經過上周四裂口高開再急升後，連續兩日於高位整固，暫時於5日線、50日線及100日線之間穿梭。恒指昨日再度高開143點，早段曾重返24738高位，升幅擴大至257點。其後反覆回落，全日倒跌32點或0.313%，報收24448，但成交則減少至1737億元。今早大市高開172點，一度升至24675高位進帳226點，半日升幅縮水至69點，成交額僅929億，反映未有外圍資金流入，上升動力仍不足。不過細摩指本地嘅銀行股跌過籠，大笨象(00005)跟渣打(02888)齊齊反彈3%。 美國中期選舉後市場震盪，資金反而持續流入估值偏低及缺乏AI股嘅港股，帶動港股回暖。不過踏入本周，美股靠穩，昨晚美國科技股更顯著反彈，資金再度流入AI股。值得留意中港內地股市能否持續吸資，如成交持續萎縮，唔排除港股喺缺乏資金支持下，無法延續上周強勁勢頭。不過暫時20日線已企穩，50及100日線則仍在整固，如此兩線本周不失，本月仍有機會進一步挑戰25000水平，甚至挑戰250日線即25400水平。相反，如兩線失守，並進一步跌穿5日線即24450水平，則有機會回踩10周線約24150-24200尋找支持，如跌穿24150，向下回補裂口機會極大。不過能守住裂口底部之上，企穩24000關，則後市仍可期待。