【盤房來料】 美國CPI強勁惹加息憂慮 全球股市齊避險(151026).docx

美國CPI強勁惹加息憂慮 全球股市齊避險 美國9月份通脹升至5個月高位，市場對聯儲局加息預期升溫，開支持續上升嘅AI相關股份，全部跌到一個七皮，三大指數中以納指表現最差。道指早段曾升近200點，其後倒跌最多304點，低見51365點；標指低開低走一度跌1.44%，以科技股為主的納指同樣曾擴大跌幅至2.21%。收市道指跌幅收窄至48點或0.09%，報51621；標指跌85點或1.11%，報收7718，53個交易日以嚟，首次跌超過1%；納指跌511點或1.88%，報26692。 燃料成本急升推動下，美國9月份消費物價指數(CPI)按月升幅由前一個月的0.4%加快至0.6%，係4月份以嚟最大增幅，雖然符合市場預期，但按年升幅亦由前一個月的3.4%加速至3.7%，則略高於市場預期的3.6%。期內，撇除食品和能源的核心CPI按月維持升0.3%，略高過預期的0.2%，按年升幅由前一個月的2.4%提升至2.6%，亦略高於預期的2.5%。CPI數據顯示，9月份汽油價格按月急攀9.1%，係伊朗戰爭爆發導致燃料價格於3月份急飆以來最大增幅；醫療護理價格升0.3%，呢兩個都係中期選舉前選民首要關注項目。數據公布後，美國10年期債息一度跳升11.88個基點，至5.3272厘，其後轉跌；對息口敏感嘅2年期債息更抽高16.09個基點，至4.9499厘，其後升幅大為收縮。貨幣市場顯示，聯儲局本月進一步加息機會率升至約50%；市場並全面押注聯儲局明年1月底前加息兩次，每次0.25厘。加息預期升溫，美滙指數最多急升0.75%，高見102.95，升至今年新高。 美銀因為反洗黑錢唔夠落力被罰款，股價一度急跌8.7%，收市仍跌4.8%，高盛回吐1.5%，摩根士丹利亦跌2.8%。《華爾街日報》報道，影視串流龍頭Netflix將裁減全球員工6%，相當於約1000個職位，股價反覆靠穩；阿Man買咗些少70嘅NFLX力保不失。不過CRWV慘敗，上唔返80，75唯有投降。寧願轉去同一個板塊，但負債比率無咁高嘅NBIS，200中咗一注，再喺180加注，均價190，另外仲有一注放咗160，即係250MA附近，150做防守。GOOG、META同埋MSFT繼續持有，不過DELL有啲濕滯，盤後穿咗500，525均價嘅貨，係用480做防守，又喺498同490各買多些少，博今晚反彈上返500樓上。INTC喺95個買盤中咗，用個90做防守，望個股價守到90嗱嗱聲彈返上100。LITE手多多，980/940各買一注，一開波就秒打920，900跟880又擺咗買盤，結果全中，依家均價890仲坐緊艇，暫時險守100日線，今晚睇住個850-870，唔對路都要走佬。本來阿Man就係plan咗CPI出個市有震盪要買下貨，誰知噚晚美股有少少panic，唔少股都跌過籠，ALAB擺嘅買盤318同292全中，今晚睇下上唔上返300-320。280附守位不容有失。噚晚一下子買咗唔少貨，本身嘅持貨係MCD隻老麥逆市升，233嘅貨都打算唔郁住，避險市反有資金流入，逆市升1%。坐住好多年嘅APPL，股價同樣逆市升0.5%，報342.96美元，首次以5萬億美元市值收市，係NVDA之後，第二間達成呢個偉大市值嘅公司，呢兩隻貨一直係阿Man嘅核心持倉。另外兩隻今年阿Man嘅愛股MU同MRVL，前者忍唔住940買咗一注，890另一個買盤中埋，均價915嘅貨，係睇住880，盤後穿埋880，情況有啲惡劣，不過之前MU累計贏咗唔少，等到今晚上唔返900就跳車先。MRVL同樣係阿Man嘅愛股，本來218嘅貨，274均價落咗車係好地地，但又手多多喺278撈返，驚死無貨蝕底，局住喺242又接多一注，均價260上返車，暫時用個230做防守，皆因240係50及100日線匯聚區，今晚守返住，應該有啲反彈。雖然阿Man個美股短炒倉坐到一褲都係，不過噚晚個NQ喺30800個分水嶺沽咗，落到30500平倉，以為跌咗三舊差不多，點知連個30400都失守，再喺30323追沽，叫做對沖返個短炒倉，目標29900/29800平倉，結果喺均價930平晒倉。至中午見夜盤去到29800，落到條100MA附近均價29850渣返NQ博反彈，見個RSI 2落到5樓下不特止，仲要穿埋2咁過份，博反彈都正常。今晚NQ分水嶺29900，支持29800/29700，呢個範圍好重要，分別係5月線同埋20周線同埋100日線，29700-29800呢啲位，正路NQ必守。至於反彈阻力30000/30100/30200/30300，30300-30400由支持變阻力，NQ要脫險，至少要上返30400。 至於昨日港股早段一度反彈，恒指低開62點後，曾扭轉跌勢倒升179點見24524高位，可惜20日線僅曇花一現，最終20日線得而復失，全日跌31點報收24314。成交額1934億元，成交仍然淡靜。不過噚日下半場彈到去20MA又回頭跌返200點，走勢嚟講都係弱過藥煲，至夜期時段，美國公布CPI後，市場對聯儲局加息預期升溫，美股除道指外，標指跟納指均顯著下跌，夜期及ADR被拖累下，跌逾200點，逼近24000大關。恒指裂口低開195點，報24119，A股跌到一仆一碌，淡友見機不可失，再將港股質低，跌勢擴大至逾200點，其後大部分時間在兩關四關拉鋸，臨近中午沽壓加重，跌穿兩萬四，最多跌368點，低見23945。恒指半日收報23955點，跌358點或1.47%。大市半日成交1137.92億元，北水淨流出5.81億元。下半場若然大市彈唔起，又或者係反彈至24050-24100又遇阻，唔排除短線再度考驗23800，甚至23600尋找支持。