【盤房來料】 如涉足日股ETF需留意匯率風險(100226).docx

如涉足日股ETF需留意匯率風險 美股上周五報復式反彈後，噚晚缺乏新催化劑下表現反覆，道指低開67點後，一度回落至5萬點關口以下，跌幅擴大至最多278點，低見49837，其後再破頂曾升至50219，倒升103點，收市仍輕微創歷史新高美市收市，道指收市報50135，倒升20點或0.04%；標指升32點或0.47%，報6964；納指反彈207點或0.9%，報23238。重磅方面，亞馬遜股價曾再回落3.3%，收市跌幅收窄至0.8%，蘋果公司跌1.2%，微軟則反彈3.1%，為升幅最大道指成份股，甲骨文急彈9.6%，Nvidia升2.5%。至於其他個股，噚日提過嘅ONDS彈返6.7%，表現唔錯，暫時反彈阻力都係睇住11-12美元先。AMD彈3.6%；TSM彈1.88%略嫌少啲，但盤後續升1.7%，都叫合格；RDW仲係死蛇爛鱔咁，但守住10美元，暫時持有先。GOOG長線繼續睇好，繼續吼位喺300-320美元收集，初步目標係前頂350左右，中長線目標380-400美元。另外想提一提ALAB急升一成後，盤後再升2.8%至193美元，又創新高，有貨嘅可以用180作防守止賺繼續持有。NQ反彈大約去到25400左右調頭，今晚個好淡分水嶺大約係25300，支持25200/25100/25000，阻力25400/25500/25600。暫時納指相對落後，要等相關科技股完成估值重塑，一直未跟到道指同標指創新高。 其實除咗美股嘅道指同標指，日股近日都屢創新高，高市早苖領導下嘅政執自民黨大勝，並控制國會超過三分二議席，咁嘅情況下軍工股有資金追入，Kawasaki川重工業，周一急升16%後，今日再升6%，五個交易日累升近三成，長線嚟講軍工股仍會有追捧，可以候回吐吸納，吼吼位喺16000-17000yen收集，防守位15000yen左右。如果唔係太識玩日本個股，直接買日股ETF，港股呢邊有南方東英嘅(03153)，美股嗰邊就有EWJ同JPXN。不過買日股ETF，要留意返個ETF係用日元計算資產值，但你買港股嘅日股ETF就要港元計算，美股嘅ETF就美元計算，所以投資日股ETF時，係會面對匯率風險，最簡單的方式爲直接選擇匯率對沖的ETF進行投資，可以規避貶值風險，咁喺美股嗰邊就有隻DXJ，呢隻ETF唔單止投資於日本股市， 同時會通過對沖日元匯率風險嚟減少匯率變動影響，對於參與日本ETF嘅投資者，又擔心匯率出現貶值嘅投資者而言，呢一款ETF或者更適合。 睇返港股顯著反彈，重上二萬七關，恒指高開422點後保持升勢，一度升551點見27111半日高位，全日升467點或1.75%，報27027，成交額2551億元，由於下周二至下周四為春節假期，預期本周開始成交將逐漸減少。雖然昨日大市反彈仍受制上周一下跌裂口，但外圍股市靠穩，美科技股持續反彈，帶動港股於夜期時段進一步反彈至27200水平，盤中更一度逼近27300，而今早黑期亦於27200水平徘徊，料今早大市再度裂口高開，延續昨日反彈之勢，並順勢回補上周一下跌裂口27100-27384。不過大市努回補上周一之下跌裂口之際，昨日卻遺下上升裂口26710至26879，而今日亦有機會裂口跳升，出現第二個上升裂口，預期本周港股回補上周之下跌裂口後，若未能企穩於27500水平，港股或以區間上落為主。留意今日收市如大市未能企穩10日線約27100-27150，受制上升通道底部，則有機會先回調再考驗5日線及20日線約26900-26950，甚至回補周一上升裂口26710-26879，今日關鍵係要望實恒生指數個27100。個股方面，噚日提及嘅文遠知行(00800)都幾對辦，噚日有跟上車就keep住先。