今年最重磅IPO中招未見引起市場興趣
8月16日，多雲，間中有幾陣驟雨及雷暴，氣溫仍然高企，天氣悶熱。隔晚美股低開高走，道指收市升151點；標指跟納指分別升16點及80點。喺市場游資仍然充裕下，上升動力仍有，只係成交略見縮減，都要提高警覺。一直推高通脹嘅元凶油價持續走弱，更跌穿92美元橫行區底部，有機會確認轉勢，油價回軟，通脹壓力大減，10年債息回落至2.77%，呢個係支持美股繼續反彈嘅原因。
不過2年跟10年債息仍然倒掛，反映美國經濟仍有機會陷入衰退，不過市場偏偏打賭明年聯儲局唔單止唔再加息，更有幾會減息放水，喺目前美股形勢大好嘅情況下，聯儲局似乎就無放水救市需要，一直只係市場一廂情願嘅睇法。只係美國基金現金水平仍偏高，聯儲局仍未加碼收水，待下月聯儲局開始縮表，加碼至每月950億美元收緊銀根，未知對美股有否負面影響。
A股近日表現甚為堅挺，兩市成交維持喺9000億以上，相對港股奀都爆嘅成交，內地股市流動性遠勝港股。上月內地M2增長12%，人行展開4000億元MLF操作，及20億元公開市場逆回購操作，充分滿足金融機構需求。而MLF操作及公開市場逆回購操作嘅中標利率均下降0.1厘，分別為2.75厘及2厘。喺人行改水下，內地股市料有支持
港股繼續乏善可陳，日復日只有七百幾億成交，以目前港股嘅規模，難聽啲講，仲衰過沙士嗰陣。港股喺20000點水平徘徊，老實講大部份股份估值處於合理甚至抵買水平，但就係無資金肯入場。港股唔上唔落，如老僧入定，買賣兩閒。最怕係一直無成交下陰乾。中免準備招股，應該係今年集資額最大IPO，但都要因應市況大減集資額，只係雷聲大，雨點小，暫未見市場有太大反應，就連新股都未能引起缸邊友興趣，要怪就怪今年以嚟上市嘅新股，幾乎無乜邊隻有好結果，試問又點引起資金興趣。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。