新一年首周IPO熱鬧 試試運氣亦無妨
1月4日，部份時間有陽光，天氣乾燥，日間氣溫回升至21度，早晚較為清涼。2021年首個交易日，古天后先同大家打打氣，祝今年各缸邊友好今炒股成績好過舊年。若然去年缸邊友有追上市場步伐，大量投資新經濟股，舊年應有不俗回報，至於今年新經濟股升勢能否延續，古天后對新經濟股仍然睇好，隨住疫苗面世，只要全球疫情受控，經濟能夠穩步復甦，估計舊經濟股亦可齊齊落鑊追落後，而上個月內需股跟光伏股已炒到出煙，預期呢兩個板塊，暫時仍可保持升勢。
總結2020年港股喺指數方面，表現落後於其他主要市場，恒指全年跌958點，跌幅達3.4%，相對屢創新高嘅美股，港股表現相對失色。不過恒指服務公司已開始就改革恒指成份股進行諮詢，成份股數目將增加，而去年亦引入唔少新經濟股，只要改革成功，預期恒指可追落後。事實上，恒指喺上星期重上27000水平，早前漸形嘅圓頂走勢已破壞，恒指有望回復一浪高於一浪嘅走勢，今個月大有機會上試二萬八水平。
值得留意係今年首個月比較特別，未知會否出現黑天鵝事件，為全球股市帶嚟震盪，有別於過往因為1月效應而產生嘅蜜月期，今年全球股市開局實難享有慣常嘅蜜月期。侵侵已事先張揚，1月6日美國將有大事發生，侵侵號召支持者喺1月6日上演大規模示威，再加上由共和黨參議員克魯茲(Ted Cruz)率領嘅11位共和黨參議員揚言，會喺國會認證總統大選各州嘅選舉人票時挑戰結果。侵侵至今仍未肯承認敗選，用盡方法試圖推翻大選結果，但市場普遍預期侵侵難以翻盤，市場早已消化相關消息。不過叫得黑天鵝事件，當然係無得預計，缸邊友只有摸石過柯，步步為營。
但上周大除外半日市，當日仍錄得逾1500億元成交額，反映投資者仍樂意喺長假期前入市，有助港股本月延續上月升勢。由於零息環境將維持一段時間，保留現金並不吸引，今年跟舊年一樣，古天后建議喺資金配置方便，仍以股票為主。不過疫苗成效及變種病毒擴散程度，將會影響企業中長線嘅盈利復甦；即使拜登順利登上總統寶座，中美關係短期仍緊張，對於舊經濟股，剛被侵侵制裁嘅內地電訊股等政治風險較高嘅風眼板塊，都係避之則吉。
今個星期唔少新股進行招股，單喺本周之內截飛嘅新股足有一隻，確令缸邊友有啲選擇困難，暫時比較多缸邊友有興趣嘅係稻草熊娛樂集團 (02125) 股價及相關新聞 ，集團為中國主要劇集製片商及發行商，是之招股見有幾個較有睇頭嘅基石投資者，同埋市值較同期招股新丁較有份量，預咗呢隻新股爭崩頭。而久久未見有醫藥股上市，古天后係指非生化藥股B仔嗰種藥股，見到2021年首隻藥股現代中藥(01643) 股價及相關新聞 招股，集團主要從事生產中成藥，在中國提供中老年人士使用的非處方藥及處方藥。集團喺2019年，，按照東北生產補氣補血類中成藥丸製造商的市場規模計算，市場份額約 1.96%，排名第二，係從事中成藥生產的非上市龍頭公司之一。公司集資額最多2.21億元，又係嗰類細細粒容易食嘅新丁。對於呢兩隻新股，一大一細係呢個星期招股新丁之中，較為特別嘅，只係古天后對於抽新股一向抱抽獎心態，抽到爆升股定破發股，都係講運氣，不過既然咁多IPO喺今年首周招股，不妨可以試試今年運氣如何。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。